بين ثنايا الايام >>>>>>روايه مره حلوه

_______________
بيت ابويوسف .. الساعه : 7:00 مساءً
_______________


** محمد **



كنت جالس بالصاله .. مع سعد .. اشوف التلفزيون .. افرفر بين القنوات .. وقفت على اغنية عادل محمود


.
.


اوعدني عني ماتغيب

تبقى هنا جنبي قريب

محتاج انا مثلك حبيبي

يفهم عيوني وضحكتي

****

فيك انت حلمي من زمان

وانت الهوى وادفى الحنان

تلقى معاك روحي الامان

ياحلى بشر في دنيتي

****
وحــدك أبيـك

والله أبيـك

بس تكفى طمني عليك

مابي احــد احد يشغــل عينيـك
وأمــــــوت أنا من غيرتي

.
.

كنت داخل جو مع الاغنيه .. بس تلفون البيت خرب علي هالجو .. رفعت سماعة التلفون .. كانت اختي رهف

قالت لي : السلام عليكم

قلت لها : وعليكم السلام ورحمة الله وبركاته .. هلا رهف

قالت : اخبارك محمد

قلت : تمام .. وانتي

قالت لي : مو بخير

قلت : افاااا وليه

قالت لي : ماتستحي على وجهك انت

وش فيها هذي بسم الله الرحمن الرحيم

قلت لها : وشو رهف

قالت وشكلها معصبه : قالولك ما ادري عنك .. الريم ماتبيك

اكيد عرفت رهف باللي بيني وبين الريم .. ريوم قالت لها بكل شي
لحظه مهبول انا .. هههههههه اصلاً وش اللي بيني وبين الريم

قالت : رد .. تكلم لو فيك خير .. فشلتني الله يفشل وجهك .. الحين وين اودي وجهي من الريم

قلت لها بكل براءه : ليـــــه .. ليـه كل هذا .. وش سويت انا

قالت وعلى صوتها شوي : اسال نفسك .. زاعج البنت اتصالات

اتصالات ؟ وش تخربط ذي : اي اتصالات

قالت لي : اسكت ولا كلمه .. متفشله مره مع الريم.. مو قادره احط وجهي بوجهها .. اكيد بتقول اخوي يغازل بنات .. الوووووووو .. الوووووو .. محمد رد .. وينك

قلت : مو انتي قلتي لي اسكت ولا كلمه

قالت : محمد اكلمك جد

قلت لها : وانا اكلمك جد .. وش قالت لك الريم

قالت لي : بقول لك بكل السالفه .. انا يوم ادق لك ذيك المره .. تذكر

قلت : اذكر .. ويعني .. ايــــــــــــــــــــه صـــــح .. لا تقوليلي دقيتي على من جوال الريم

قلت له : وشلون ماتدري .. مسوي رقم الريم مو عندك

’’ يوم تدق علي .. انا كنت نايم ..وماحطيت في بالي .. ماركزت’’


كملت : الريم حافظه اسمك في جوالها بــ المغثه

لا حطمت قلبي رهف .. معقوله طول هالفتره انا كنت غاث الريم .. انا على بالي مستانسه بالرسايل .. صحيح انا دلخ .. مستحيل وحده بتستانس برسايل ما تدري من اللي مرسلها

قالت : محمد قول لي وش السالفه

قلت لها بكل السالفه من طأ طأ .. للسلام عليكم

قالت لي : انت يعني الحين تحب الريم

قلت لها : اكيد ولا على بالك انا تبع بنات

قالت لي بكل جديه : طيب متى بتخطبها

الله اخطبها .. حلمي ان الريم تصير زوجتي .. قلت لها : ظنك توافق

قالت لي : ترا الريم يجونها خطاطيب من كل مكان .. بنت الكل يتمناها .. يعني لو ماخطبتها الحين .. بتروح عليك .. مو بعدين تجلس تتندم

قلت لها : طيب المهر غالي ؟ .................. وينها ذي وش فيها قالت باي وقفلت .. ليكون سؤالي فيه شي !!

ناظرت بجنبي .. شفت سعد جالس بجنبي .. ويناظرني بتركيز .. ويقول لي : متى بتخطب الريم !!!؟؟؟


...................................


____________
بيت مشعل .. الساعه:7:30 مساءً
____________


** فيـصل **


هذي بنت عمتي نجود .. وش فيها.. طار عقلها ؟.. شكلها وهي نازله بكل حذر .. يضحك .. انا مسكت ضحكتي ما حبيت افشلها

فقلت لها بجديه : وش تسوين هنا

كانت متوتره وخايف .. وتناظر يمين وشمال وورا وقدام .. وفي كل جهة

قلت لها : انا اسألك .. وش فيك

ناظرت تحت وسكتت .. انا مبتسم على اخر شي .. ماابي اضحك

عندي فكره دامها كذا.. تتراجف وحالتها حاله .. بخوفها .. سويت نفسي بروح .. ومستعجل

قلت لها : بروح بقول لاخوك مشعل

مسكت طرف كمي بقوه .. وقالت بأنفعال : لا لا لا الله يخليك .. انا انا انا بروح لحالي .. لا تقول لاخوي مشعل

انفجرت من الضحك ههههههههههههههههههههههههههههههههههههههههه نذل انا صح

اشرت لها بصبعي .. وقلت : ماراح اعلم عليك بشرط

تركت طرف كمي وقالت : وشهو

قلت لها : قولي لي .. وش تسوين هنا

قالت لي بتوتر وهي منزله راسهه : انا .. كـ كنت كنت بشوف اذا اخوي محتاج شي ولا لا

قلت لها : واللي يبي يشوف اخوه محتاج شي اولا .. يجي من الدريشه مثل الحراميه ,, اشرت على الدريشه ,,

لفت وجهها عني .. وقالت : ايه انا احب اجي من الدريشه

تكتفت وسندت نفسي على الجدار .. وقلت لها وانا مأشر على الدريشه : طيب وانا اقولك..مشعل مو محتاج شي .. يللا ارجعي من الدريشه يا القطوه يا الحراميه

قالت لي بعصبيه : انا مو قطوه ولا حراميه

قلت لها : والله مايدخلون من الدرايش الا القطاوه والحراميه ههههههههههههه

قالت : والله الحرامي هو اللي يتمشى في بيت مو بيتهم لحاله

شهقت وقلت لها : تطرديني

حطت يدها على فمها .. وفتحت عيونها بقوه وقالت : مو قصدي كذا

بضحك عليها .. وبلعب باعصابها مره ثانيه .. عقدت حواجبي .. وقلت لها : والله القصد واضح .. وانا اسف على الازعاج

قالت لي : لا فيصل

غمضت عيوني .. وقلت لها : مافيه داعي .. انا انهنت وفي بيت عمتي .. والانسان له احاسيس وكرامه

عطيتها ظهري .. وقلت وانا منزل راسي : انا بروح الحين .. بس بدون رجعه .. ومستحيل انسى
انك جرحتيني وطردتيني واهنتيني

ما اسمع صوت .. ليكون راحت .. وانا جالس اكلم حالي .. لفيت لقيتها منزله راسه ..وضامه يدينها مع بعض

حسيت اني خربتها .. قلت لها : نجود .. انا امزح

رفعت راسهه .. وكانت عيونها تلمع .. او يتخيل لي .. مدري بس المهم هي متأثره .. والله شكلي جبت العيد

قلت لها : قسم بالله امزح .. حتى شوفي ’’ ضحكت ضحكه بارده ،، هه هه هههه

طنشتني .. وفتحت باب المجلس وراحت تركض .. ناديتها بس مارجعت .. احس بالذنب .. اكيد تقولون اللي يسوي سواتك مايحس بالذنب .. بس صدقوني احس بالذنب .. حتى نسيت ليه انا جيت هنا .. ايه صح بدخل الحمام (( الله يكرمكم ))


.........................

____________
بيت مشعل.. الساعه 12:30 مساءً
____________



** مشعل **

ابي انام نعسان .. رهف مو مخليتني انام .. كل شوي تسألني سؤال .. بس الظاهر حبت اهلي .. حتى امي ماتت عليها .هزتني وقالت : مشعل مشعل .. لا تنام ..بسألك

قلت لها بملل : نعم

قالت لي : امك .. مو ام نجود

قلت لها : لا حنا ابونا واحد .. بس امهاتنا غير

قالت لي : ووين امها

قلت لها : ماتت

قالت : الله يرحمها

سكتت شوي .. بعدين قالت .. ايه صح مشعل .. ابي اسألك سؤال بعد

قلت لها : وشهو السؤال

قالت: انت ليه قلت لاهلك .. اني صديقة نجود بالدراسه

هذي من قال لها .. ماكنت ابيها تعرف اني قايل لاهلي كذا .. قلت : انا ماقلت

قالت : الا قلت .. حتى نجود قالت انك موصيها تقول هالكلام

قلت لها واسوي حالي مو مهتم .. لاني ما ابيها تعرف شي : انا ما اذكر اني قلت كذا


قالت : خلاص مو مشكله

زين انها ما اصرت .. غمضت عيوني .. غفيت شوي ..هزتني مر ثاني وقالت : مشعل انت زوجتك من سوريا

قلت لها : لا زوجتي سعوديه .. امها لبنانيه .. بس وش دراك .. رهف انا بقول لك شي اوكي .. قولي لي اوكي .... قولي .... وينك .... نمتي

لفيت عليها لقيتها نايمه .. غمضت عيوني .. حاولت انام وماقدرت .. كله من رهف .. تنام وماتخلي غيرها ينام .. قمت من السرير .. فتحت المكتب .. يااه هالمكتب مغبر .. من زمان مادخلته .. فتحت الدرج .. طلعت صورة ام رغد .. ما اتخيل اني في يوم بنساها .. او بحب غيرها .. بست الصوره ورجعتها


...................................

______________
السياره .. على طريق الدمام .. الساعه 1:30 مساءً
______________



** نايف **

رجعنا للحر والغبره .. الناس تحن لبلدها .. وانا العكس .. مو ماحنيت .. بس ماكنت ابي دراستي بأمريكا تخلص .. فتحت الباب ونزلت من السياره .. ناظرت للبيت .. كل شي مثل ماهو .. ماتغير علي شي .. كانت فيه سياره قدامنا واقفه .. نزلت منها بنت .. حامله شنطه .. شكلهه جايه من مدرسه

ناظرتني شوي .. وابتسمت

غريبه .. اول مره في حياتي احد يشوفني للمره الاولى ويبتسم .. وجهي ماهو بشوش .. ولا يستانس الواحد لا شافه .. اصلاً اللي يجلس معي كثير يمكن مايحبني .. لاني على طول جاد .. ولا ابتسم الا نادر


.................................................. ........

** رهف **


من هذا ؟ سواق ولا وشو .. مو قادره افتح عيوني واشوف زين من الشمس


** نايف **

للحين تنار فيني .. من هذي ؟ انا ما اعرفها .. لا يكون هذي رغد بنت مشعل .. لالا مايمدي هذي كبيره

** رهف **

حطيت يدي فوق وجهي ودققت فيه .. لالا هذا مو سواق يافشلتي
اغطي وجهي الحين .. اولابيصير موقفي يفشل..اذا فجأه اغطيه
جالس يناظر فيني .. خلاص بغطي وجهي

** نايف **

وش فيها غطت وجهها ’’ ابتسمت على حركتها ’’

** رهف **

يبتسم .. فشله اكيد قال انا غبيه

** نايف **

دخلت البيت .. وناظرت فيه من داخل .. كل شي مثل ماهوا ماتغير شي

ناظر في اول كنبه بالصاله .. وجلست عليها .. اذكر اني كنت احب اجلس على هذي الكنبه

** رهف **

وش فيه دخل البيت بدون لا احم ولا هلا

دخلت داخل بسرعه .. وشفته جالس على الكنبه وحاط رجل على رجل

وكان البيت بيت ابوه

** نايف **

ناظر لجهة الباب ولقيت البنت واقفه .. سالتها : من انتي ؟

** رهف **

قلت له : انا زوجة مشعل

** نايف **

وقفت بسرعه يوم قالت انا زوجة مشعل .. وش السالفه الناس تكبر مو تصغر .. وهذي صغيره

** رهف **

بركب اقول لمشعل ينزل بسرعه لان الوضع مايطن

^*^
/
\
/
\
/
\
/
\
/
^*^



**** نهاية الجزء الثامن ****



1- ياترا من هذا نايف؟؟؟ .. ووش موقعه في قصتنا ؟
2- وش ردة فعل الاهل اذا شافوا هالشخص ؟
3- وحنان الى وشو تخطط ؟
4- و ياترا محمد بيتزوج الريم وبنفرح فيه والا ؟

انتظروني في الجزء التاسع
احـــــــــبـــــــــــــكم

...:::][ الجزء التاسع ][:::...


___________
بيت ابو يوسف.. الساعه :1:30 مساءً
___________


** محمد **

كنت جالس بغرفتي .. اكتب اوراق حق الشغل .. ومعي سعد .. يلعب في جوالي ..تلاحظون اني اجلس مع سعد كثير ..احب الصغار .. لاجلست معهم ماتمل .. بس الحين انا مخليه يلعب في الغرفه لحاله .. لاني مشغول

سألني : محمد؟

قلت له وانا اكتب : نعم

قال : وش لون ترسلون بالجوال رساله

قلت له : يا النصاب .. انت تعرف .. اشوفك تكلم رهف بجوالي

قال : اعرف ادق .. بس ما اعرف ارسل رسايل

قلت له بملل : لا صار عندك جوال بعلمك

قال لي : ما ابي ما ابي .. اناابي الحين .. برسل لرهووف رساله

تركت القلم .. واخذت الجوال .. جلست اعلمه .. ذكي بسرعه يتعلم

قال لي : ليه اغلب الرسايل لغلا روحي

كذبت عليه .. وقلت له : غلا روحي هذا .. ولد جيراننا عبوود

عطيته الجوال .. ورجعت اكمل اوارق الشغل

قال لي : خلاص ارسلت

قلت له : ارسلت لرهوف

قال : لا ارسلت لعبوود

اخذت الجوال بسرعه .. وفتحت الرساله اللي ارسلها


^*^
/
\
/
\
/
^*^


*القلب ينبض بحبــــك *


*والعين ترمش لاجلـــك*


*والخشم يشم ريحتـــك *


(اف) اتسبح مالت عليك


^*^

شفت الرساله وانا فاتح عيوني على الاخر .. ومنصدم ... يــــــاربـــي .. وش مرسل للريم هذا .. حطيت الجوال على الارض .. وطقيته على راسه

وقلت له وانا معصب : ليه ترسل بدون ما تقول

فتح لي فمه وجلس يبكي .. قال لي : عادي كله الا عبودووه الغبي .. انا ما احبه .. اخوه اخذ كورتي اللي شريتها لي

قلت له وانا معصب : خلاص اطلع بره .. لا طقيتك بعد مره

طلع من الغرفه وهو يبكي

الحين وش بتقول الريم .. لو هو اول ماتدري انا من .. بس الحين تدري اني محمد
بكتب لها مسج حلو



......................

__________
بيت الريم .. الساعه : 1:40 مساءً
__________

**الريــم**


شوفوا هذا .. من زمان ماجاتني منه مسجات ..والحين كاتب لي مسج ريحتك خايسه وتسبحي ومدري وشو .. وش قصده يعني .. والله انه ما يستحي

هذا مسج ثاني بعد


^*^
/
\
/
\
/
^*^

دمـــعــه تســـيــل

وشــمعــه تــنــطــفــي

والعــمــر بــدونـــك

يـــخـتــــــفــــــــــي

ومـــــن دونـــــك قـلـــبـي

يــنــــتــهـــــي ...

,, M ,,


كتب مسج ثالث


^*^
/
\
/
\
/
^*^


منهو مثلك

من ســواك

داخل الخاطر

غــلاك

يلي حبك هو

حياتــي

كل احاسيسي

معــاك

,,M,,


^*^
/
\
/
\
/
^*^

ايه جالس يرقع .. حس ان مسجه الاولي يفشل ..انا بسوي نفسي مدري هو من .. بس رهف تدري اني حافظه رقم محمد في جوالي .. ’’بالغثه’’ .. ان شاء الله ماتقول له ’’ حطيت يدي على فمي ’’ لايكون رهف تحسب اني اكلم اخوها .. بدق عليها وبشوف

دقيت عليها وردت على طول : الووو هلا ريووم

قلت لها : هلا بك زود .. اخبارك

قالت : بخير الحمد الله .. وانتي

قلت : دووم .. انا بخير

قالت : يدوم عزك

قلت لها : رهووفه تعالي تغدي معي بكره

قالت : لا انا بكره بروح بيت اهلي .. وانتي تعالي تغدي معي

قلت لها وانا اسوي معصبه: انا اللي قلت اول

قالت :يللا عاد ريووم

قلت لها : لاني طيبه بتنازل

قالت : ههههههههه احلى يا الطيبه .. ريموه تدرين

قلت لها : لا ما ادري وشو

قالت لي بصوت خفيف : فيه واحد داخل بيتنا .. وجالس في الصاله .. بدون لا سلام ولا كلام .. مانعرفه

قلت : معقوله!! .. وصلت بالناس الوقاحه .. انهم يدخلون بيوت الناس .. بدون لا احم ولا هلا

قالت : ايه .. والحين انا بدخل الغرفه .. بقول لزوجي .. عشان يتفاهم معاه

قلت : ايه زين تسوين .. اجل روحي قولي له

قالت : طيب حبيبتي بخليك الحين

قلت : اوكي .. باي

............

____________
بيت العمه..الساعه 3:00 مساءً
____________


** حنان **


كانت امي تقول لنا سالفة مشعل .. والحاله اللي هو فيها الحين .. ختمت كلامها : وتخيلوا عاد .. الحين نايف جا من السفر .. بيكوش على كل شي

قلت انا بصوت عالي .. ورافعه يديني الثنتين : الحمد الله .. الحمد الله .. الحمد الله ..اشوى اني ماتزوجت مشعل .. ياربي مره مستانسه .. اول مره احس ان الحظ معي .. بطير من الوناسه .. اكيد الحين رهف تلعن اليوم اللي اخذت فيه مشعل ..هههههههههههههههههه ..ابي اشوف شكلها وهو يقول لها بالسالفه

قالت امي : تلقينها الحين بالعنايه المركزه

قلت لامي وانا اضحك : لا بمستشفى المجانين .. لان طار عقلها من الصدمه

قالت امي : ايه وانتي الصادقه هههههههههههههههههههه

تكلمت الخبله هنوف .. وقالت : حرام تتكلمون على بنت الناس من ورا ظهرها .. وش دراكم انها كذا

قالت امي : الا والله مبين من عيونها .. اللي تقول عيون ضفدع

قلت بعصبيه : اصلاً انتي وش مجلسك معنا .. انقلعي ذاكري

قامت بسرعه .. وطلعت برا

ماعلينا منها غبيه ذي ..تصدقون ..يوم عرفت بسالفة مشعل .. حسيت نفسي بمعركه مع رهف .. وانا اللي انتصرت .. ماتشوفوني مبتسمه .. ابتسامة النصر .. الحين مشعل خلاص .. بشيله من بالي .. مايناسبني وهو منتف ماعنده شي

لفيت على امي وقلت لها : طيب يمه .. وشلون اخلي نايف يتزوجني ؟

قالت : انتي حلوه وذكيه .. وهو ولد عمتك ..يعني مو صعبه عليك

قلت لها :يمه .. نفس الكلام قلتيه لي .. يوم كنت ابي مشعل يتزوجني

قالت : مشعل هذا خليه عنك .. ولا تجيبي طاريه .. زين انك ماتزوجته .. كبير وعنده بنت .. والحين ماعنده ولا فلس

قلت لها : ادري يمه .. ماراح اجيب طاريه اصلاً انا من اول قلت هالمشعل مامنه فايده .. بس انتي قلتيلي يوم كنت ابيه .. اني ذكيه وحلوه .. وعلى طول بيحبني وبيتزوجني .. وماصار

قالت : لان ماعنده نظر .. بس حطي في بالك ترا نايف ثقيل

قلت لها بقهر : اوووف اذا الخفيف ماطيحته .. وشلون اطيح الثقيل

قالت لي وهي تغمز : بس ظيفي على مقادير طبختنا الاولى .. جرعتين دلع .. حبة طيبه وحنيه .. ملعقه كبيره حب و سحر ورومنسيه .. ملعقه صغيره من التغلي .. رشتين عطر ..و صحن لصقه

قلت لها : وشو صحن لصقه .. تبيني الصق فيه ..عشان يقول عني نشبه

قالت : لا يا الذكيه .. انتي بتلصقين في قلبه وتفكيره .. خليه وين ماراح يشوفك .. مثل ظله

قلت : طيب يمه ..هذي مقادير الطبخه .. والطريقه ؟

قالت : الطريقه .. من بكره انتي في بيت خالك


..................................

____________
بيت مشعل ..الساعه 4:00 مساءً
____________


** فيصل **


تونا انا ونايف راجعين من المطعم ..بعد ماتغدينا نايف حلف علي الا ارجع معه البيت .. فرجعت معه .. دخلنا وجلسنا بالصاله

قلت لنايف : وين اهلك .. طالعين

قال : صحيح غبي .. وشلون بعرف اذا كانوا طالعين او موجودين .. وانا تو داخل معك البيت

قلت له : وانت ماعندك سالفه الا تفشل فيني

طلعت من المطبخ ام مشعل .. سلمت علي وجابت لنا القهوه .. وراحت

نزل مشعل من الدرج .. قال : السلام عليكم

قلنا : وعليكم السلام .. حي الله مشعل

قال : هلا والله فيصل .. يللا عن اذنكم

قال نايف : وين مشعل .. طالع ؟.. اجلس معنا شوي

قلت انا : ايه والله مالك داعي صراحه

قال : عندي شوية شغل بالشركه .. لازم اروح

قال نايف : ايه على طاري الشركه .. مشعل انا بكره بداوم .. وبستلم الاداره

قال مشعل : بس انت ماتعرف شي بالشغل

قال وهو يصب له قهوه : انت تعلمني

سكت شوي وقال : مو مشكله

فتح باب الصاله وطلع .. ناظرت لنايف وقلت له : من جد بتستلم الاداره

صب لي قهوه .. وقال : ايه

قلت وانا مستانس : احـــلـــى .. حركـــات

قال : كم ملعقة سكر احط لك .. بالقهوه

قلت : ملعقه بس ..ما احب كثرة السكر

قال بأستخفاف : شفت بعمرك احد يحط بالقهوه العربيه سكر ! هندي انت ؟ .. خذ بس

وهذا من الصبح طايح فيني تفشيل .. قلت له : الا نايف .. يرضيك حال ولد عمتك .. انت مدير .. وانا بالاتصالات

قال لي : من فشلتك تغير الموضوع

قلت : اوووه نيوف خلك بموضوعي

قال : لا طبعاً ما يرضيني .. لك الوظيفه اللي تبيها بالشركه

نطيت عليه سويت نفسي ببوسه ..قال لي : قم عني .. قطعت نفسي يا الخايس

قمت و قلت له : انا خايس بروح بيتنا خلاص

قال لي : واحد ماسكك ؟

قلت : بعد

قال : اجلس بس وش تروح

قلت : لا والله بس بروح ..للحين مانمت .. ابي اصلي المغرب وانام

قال لي وهو رافع حاجب : دجاجه تنام لي من المغرب

قلت له : قسم بالله .. من امس الساعه 1 بالليل للحين مانمت

قال : زين انك حلفت لاني ماكنت بصدقك .. طيب اجلس معي عادي نسهر سوا

قلت له وانا ابتسم بسخريه : غبي انت .. اقولك بنام تقول لي نسهر سوا .. والله حاله

قال : تفشلني فيصلوه .. انا اوريك ان مافشلتك بأول دوام لك بالشركه قدام الموظفين .. ما اكون انا نايف

قلت له : ادري فيك تحبني وماتسويها .. على العموم انا طالع تبي شي

طلعت ام مشعل من المطبخ .. شافتني واقف قالت : وين بتروح .. تو الناس .. اجلس تعشا مع نايف

قلت وانا ابتسم : مره ثانيه ان شاء الله

قالت : مسويه مكرونه بالبشميل .. لحظه بقول لنجود تحط لك منها .. ’’ قالت بصوت عالي ’’ نجـــــــــــــــــود .. حطي لولد عمتك من المكرونه بالبشميل

بعد 5 دقايق

جات نجود بالصحن ..قالت : السلام عليكم .. تفضل

قلت : وعليكم السلام .. زاد فضلك

عطتني اياه ورجعت المطبخ

قلت لنايف وام مشعل : يللا نشوفكم على خير .. والجايات اكثر

.
.
.


طلعت .. بس ماطلعت من البيت .. طلعت من باب الصاله .. ولفيت ورا البيت .. ,, بيت خالي واعرفه زين ,, وصلت لعند دريشة المطبخ .. ناظرت و لقيت نجود لحالها ’’ متحجبه طبعاً ’’ .. رحت وفتحت الباب بشويش

النكته كانت فاتحه باب الفرن .. وجالسه على الارض .. تاكل من صينية الماكرونه بالبشميل .. وتغني

/ ياطب طب وادلع يايقول انا تغيرت عليه ... انا ازعل اولع مهو كل همي ازي ارضيه /

هزيت راسي وقلت : اقول لك قطوه وحراميه .. ماصدقتيني

لفت راسها .. من شافتني تركت الملعقه و وقفت

قلت لها : لا لا كملي اكل يا القطوه .. بس حبيت اقول لك .. ان كنتي شايله بخاطرك على قبل امس يوم امزح معك .. فأنا مو قصدي

نزلت راسها وسكتت .. وهي تبلع الاكل

قلت : الظاهر مافيه رد .. بس بطلع الحين لا يجي اخوك .. ,, اشرت لها بيدي وقلت ,, بــــاي يا الحراميه

قفلت باب المطبخ .. وجلست اضحك عليها



..........................................



** نايف **


بعد ماطلع فيصل .. شغلت التلفزيون .. جلست افرفر .. مافيه شي حلو .. قفلت التلفزيون .. ورحت المطبخ .. دخلت شفت اختي نجود .. قلت لها : جودي .. حطي لي مكرونه بالبشميل

قالت : نعم ..هااه .. لا بس شبعانه

قلت لها وانا ااشر على نفسي : حطي لي انا .. انا اللي باكله

قالت : اهااا .. طيب

راحت اخذت كاس .. وش بتسوي ذي ؟ .. صبت لي مويه وجابتها لي .. وش فيها جودي خرفت

حطيت يدي .. على جبهتها وقلت : سلامات جودي .. فيك شي .. تعبانه ؟

هزت لي راسها يعني لا

قلت لها : طيب روحي الغرفه نامي .. شكلك نعسانه

حطت الكاس على الطاوله .. وطلعت .. اخذته وشربته .. واخذت الصحن حطيت لي .. واكلت .. بعد ماخلصت .. طلعت من المطبخ .. وركبت فوق ..كنت بدخل غرفتي .. بس سمعت صوت بالصاله .. ناظرت هنا وهناك .. لقيت زوجة اخوي جالسه على الارض وبجنبها عشرة تلفونات .. راقبتها بدون ما اتكلم .. لقيتها تجرب هذا وتحط هذاك .. الظاهر ماتدري ان فيه مشكله بخط التلفون .. ظليت اراقبها .. اخذت مقص وقربت سلك التلفون .. وش بتسوي هذي .. خل اروح اقول لها ان الخط خربان .. رحت قلت : احم احم

لفت شافتني .. وقفت وعدلت الحجاب .. قالت بتوتر : لو .. لو سمحت اخوي .. مافيه خط هنا .. ممكن تشوف لي المشكله

وش فيها هذي كانها تكلم موظف ؟

قلت : ايه ممكن .. هاتي اشوف

جلست اقصقص بسلك التلفون .. واخربط .. اسوي نفسي عارف.. وقفت وقلت لها : اهاااا عرفت المشكله ..فيه خلل بالخط خربان .. جيبوا اي واحد عنده خبره يعدله لكم .. انا لو ماكان الموضوع يبي له دقه .. كان سويته .. بس ياخذ وقت

قالت : لا مافيه داعي تسويه ..خلاص بكره نقول لواحد عنده خبره يسويه لنا

قلت : عادي اذا تبين التلفون ضروري اسويه الحين .. حتى لو الموضوع دقيق وياخذ ساعات .. ماعندي اي مشكله

قالت وهي مستحيه : ما ابيه ضروري .. لا تتعب نفسك .. ومشكور

قلت لها : العفوو ماسوينا شي .. عن اذنك

دخلت الغرفه .. ووقفت عند الباب ..,, صدقت .. والله محد قال لها هي اللي كلمتني وكاني عامل عنده خبره ,,

سمعت صوتها تتكلم .. ليكون تقول لخالتي ام مشعل .. بالخرابيط اللي قلتها لها .. قربت اذني عشان اسمع .. وهذا اللي سمعته

رهف : مشعل نسيت اقول لك .. انا بكرا بروح بيت اهلي

مشعل بصوت عالي : اوووه رهف لا تأذيني بخرابيطك .. انا راجع من الشغل تعبان ابي انام .. وانتي بروح بيت اهلي وبروح مدري وين .. روحي مكان اللي تبين .. من اليوم وطالع لا تقولين لي بروح وبروح .. خذي السواق وروحي معه .. مزاجي مايسمح لي اسمع كلام فاظي

.
.
.

هذا مايستحي يكلم زوجته بهذي الطريقه .. اتحداه كان يكلم زوجته الاوليه اللي قهر ابوي عشانها كذا .. لو غيره بهالعمر .. ومتزوج وحده مثل هذي .. باس يده وجه وظهر

^*^
/
\
/
\
/
\
/
\
/
^*^

***** نهاية الجزء التاسع *****

...:::][ الجزء العاشر][:::...


___________
بيت الريم .. الساعه : 2:00 مساءً
___________


** الريم **


رجعت من المدرسه بدلت ملابسي وصليت .. وعلى طول على بيت رهف ..وصلت البيت .. فتح لي سعد .. دخلت لقيت رهف وامها ومحمد .. جالسين بالصاله .. قلت : السلام عليكم

الكل قال : وعليكم السلام ورحمة الله وبركاته

من شافني محمد قال : يللا انا استأذن بروح الشغل

وطلع .. قالت لي رهف : اخبارك ريوم

قلت : تمام الحمد الله

قالت ام يوسف : تعالي يابنتي اجلسي .. كيف حال امك والاهل.. عساهم زينين

جلست وقلت : زينين يسألون عنك

قالت : تسأل عنهم العافيه .. يللا اجل انا بروح احط الغدا

جا سعد سلم علي وجلس بجنبي .. كان لاصق فيني .. كل شوي يلف علي ويبتسم

قالت له رهف : مافيه مكان بالصاله .. الا بجنب الريم

نزل راسه مستحي

قلت انا: خليه وش عليك

شغلت التلفزيون .. وحطت على mbc3 .. اشرت لسعد وقالت له : يللا شوف التلفزيون هذا توم وجيري انت تحبه

جلس يشوف التلفزيون .. شوي و قالت لي رهف : ريوم اممممم .. وش رايك باخوي محمد

مثل ماتوقعت رهف تحسب اني اكلم اخوها .. والحين تسويلي اختبار .. تبي توهقني

قلت لها : اما عاد .. وش دخلني في محمد عشان اقول رايي فيه

دخلت شعرها ورا اذنها وقالت : لا مو كذا .. مافهمتيني

قلت : اجل .. يللا قوليلي عشان افهمك

قالت : بصراحه امس اخوي قال لأمي .. انه يبي يخطبك .. بس بالاول قال اسألك عشان اعرف رايك .. قبل ما يروح مع اهلي

محمد يبي يخطبني ؟..يعني يحبني ويبيني !!.. لا يمكن مايحبني .. بيخطبني لاني بنت جيرانهم و صديقة اخته .. وحسني انسب وحده له

قالت : ماقلتي لي رايك

سكت ماقلت لها شي

قالت : يللا عاد لا تستحين

قلت لها : هااه .. رهف وش اقول لك .. مدري انا

قالت : مو مشكله فكري .. والله يعيني على حنة محمد اليوم

ابتسمت ونزلت راسي

قالت : ايه صح ترى المسج .. اللي جاك امس مو محمد اللي كتبه

قلت لها : اي مسج

قالت : اللي تسبح ومدري وشو .. سعد هو اللي ارسله

اها يعني محمد .. قال لها الصدق .. اني ما اكلمه .. وهو بس اللي يرسل لي مسجات

قال سعد بصوت عالي .. وهو منسدح بجنب التلفزيون : كذابه رهف .. انا ما ارسلت لك شي

قالت بصوت عالي : وانت قاط اذنك معانا وكملت بصوت هامس : ماعليك منه .. هو اللي ارسله

اشوى ان مو محمد اللي كتبه .. كنت بقول ماعنده ذوق ,,, شوي وجات ام يوسف بالغدا .. وقامت رهف تساعدها ,,,

.................................

** رهف **

رحت المطبخ عشان اساعد امي .. اخذت الصحون .. ولفيت عشان اطلع .. وقفتني امي

وقالت بهمس : انا حذتك يارهف ياويلك لو تقولين لأبوك بسالفة مشعل

ناظرتها وقلت بضيق : وليه بالله ما اقول ؟

قالت : حرام تزعلين ابوك

ضحكت وقلت : حرام ازعله ؟

قالت : ايه انتي ماتدرين ان ابوك زوجك مشعل لمصلحتك .. الحين ان عرف بـ....

قاطعتها وقلت : والله اللي يسمعك يقول .. انا مت اول صار فيني شي

قالت : بسم الله عليك يابنتي .. بس وش راح تستفيدين اذا قلتيله ؟

قلت : الا راح استفيد كثير .. لاني ادري ان ابوي زوجني مشعل عشان فلوسه مو عشان شي ثاني .. وانا ابيه يعرف ان الفلوس ماتدوم .. وانها مو اهم شي في الدنيا

قالت بحزن : ابوك عارف هالكلام

قلت : ما اتوقع

قالت بحزن : عشان خاطري يابنتي

قلت : يا الغاليه انتي على عيني وراسي .. وتامرين امر ماراح اقول لأبوي تدرين ليه ؟

قالت : ليه ؟

قلت : لاني ماراح استفيد شي هههههههه

ضحكت وقالت : ايه هذي بنتي اللي اعرفها .. يللا الغدا راح يبرد

قلت : ايه بس بودي الصحون

طلعت من المطبخ .. شافتني الريم

وقالت : وش فيك رحتي ونمتي ترا انا بموت جوع ههههههههه

قلت : هههههههههه شكلك ماتدرين ان الغدا عندنا بفلوس

قامت من مكانها وقالت بمرح : يووه بفلوس والله مادريت ؟ اجل باي باي بروح بيتنا

مسكت عبايتها وقلت : لا تخافين فيه تخفيض للاهلو المعارف والاصدقاء

ناظرت فوق وهي تفكر

قلت وانا ابتسم : خلاص بنخليه لك مجاني

حطت يدها على صدرها وقالت بأرتياح : ايه اشوا

قلت : بس مره ثانيه بفلوس

قالت : ماراح اجي مره ثانيه ههههههههه

قلت : اتحداك هههههههههههه

......................


___________
بيت مشعل .. الساعه :2:30 مساءً
___________


** نجود **

كنت جايه من برا ..ابشركم خلاص بشتغل .. بصير الاخصائيه الاجتماعيه نجود ..فتحت شنطتي .. جلست ادور فيها .. وين جوالي .. مو هنا .. تصدقون تو احس اني نسيت الجوال بغرفتي .. كنت افصخ العبايه .. طلعت خالتي فاطمه من المطبخ تقول : هاه يابنتي بشري

قلت لها وانا ابتسم : خلاص بشتغل

قالت لي :من متى بتداومين ؟

قلت : من بعد بكرا انا بداوم

قالت : بصير لحالي الصبح .. انتي ومشعل ونايف بالشغل .. ورهف بالمدرسه

قلت لها : وش نسوي بعد .. يللا معك رغد .. الا وين رهووف

قالت : راحت بيت اهلها

هزيت راسي .. ولفيت عشان بروح .. قالت لي : ايه صح .. كنت بنسى .. دقت عليك بنت عمتك حنان اليوم ثلاث مرات وقالت تبيك ضروري

قلت لها : يعني الحين التلفون شغال

قالت : ايه جا عامل صلحه لنا

هزيت راسي .. وركبت غرفتي .. دخلت .. كان جوالي فوق السرير .. اخذته وجلست على السرير .. كان فيه 10 مكالمات لم يرد عليها من حنونه

وثلاث مسجات

فتحت المسج الاول كان

^*^
/
\
/
\
/
\
/
\
/
^*^

جودي ردي على جوالك ابي اكلمك


.. والمسج الثاني ..

^*^
/
\
/
\
/
\
/
\
/
^*^

وينك انتي ؟ ابيك ضروري
كلميني اوكي


.. المسج الثالث ..


^*^
/
\
/
\
/
\
/
\
/
^*^

جودي دقيت على بيتكم قالت لي ام مشعل
انك طالعه لا رجعتي كلميني على طول
لا تنسين

^*^
/
\
/
\
/
\
/
\
/
^*^

غريبه ؟.. وش تبي حنان .. الظاهر فيه شي خطير .. الله يستر


.. جيت بدق عليها من جوالي .. لقيت الجوال مافيه شحن..حطيته يشحن .. بدلت ملابسي .طلعت من الغرفه للصاله ..جلست على الكنبه .. واخذت سماعة التلفون .. دقيت رقم بيت عمتي .. يووه هذا فيصل .. مافيه الا هو بالبيت عشان يرد ؟ ..انا مقهوره منه هالايام .. عشان كذا .. قلت له بجديه : الو السلام عليكم

قال : وعليكم السلام

قلت له : حنان موجوده

قال : ايه من نقول لها

ما ابيه يعرف ان هذي انا .. قلت : مشاعل

قال : طيب يامشاعل .. انا بقول لك سالفه

مايستحي فيصلوه .. يسولف مع اي بنت .. كل شي عنده عادي

قال : السالفه .. مره ناس مسويين لهم مكرونه بالباشميل .. بس ما كلوه مساكين ..قولي ليه ؟

هالغبي .. السخيف .. البايخ .. لو هو قدامي عطيته كف

كمل كلامه : المهم انا بقولك ليه .. لانهم مايقفلون دريشة المطبخ زين .. وتعرفين القطاوه مايدخلون الا من الدرايش .. دخلت عليهم قطوه من الدريشه .. وكلت المكرونه كله ههههههههههههههههههههههه

قلت له : بايخ .. ماتضحك

قال بعد ماوقف ضحك : وش فيك معصبه .. انا اقولك سالفة ناس مالك شغل فيهم

قلت له : فيصل ..ترى ....

قال : وش دراك ان اسمي فيصل ؟

جالس يستهبل علي .. طنشته وكملت كلامي : ترى كل شي له حدود

قال لي :حـبـك بـحـر مــالـه حــدود .. واسـمـك بـقلـبـي مـوجـود

هذا مايحس ..مايستحي .. قلت له : انصحك ماتغني مره ثانيه

قال : افااا ليه

قلت له : وين حنان

قال : تبين امي

قلت له : لا حنان

قال : تبين الهنوف

قلت : اووف لا حنــــان

قال : تبين فيصل

خلاص زودها ذا .. قلت له : خلاص فيصل

.
.
.

قفلت في وجهه ..احسن اجل جالس يستهل ويغني وينكت علي

رن التلفون .. ورفعته .. قلت : الووو

كان فيصل .. قال لي : مره ثانيه لا تقفلين السماعه بوجه الناس المحترمين اللي مثلي .. ,, قفل التلفون بوجهي ،،

معتبر حاله من الناس المحترمين !!

لكن كله مني يوم اقول بشوفه هذاك اليوم .. واطلع مع الدريشه .. مسكها علي القطوه والحراميه

.. المهم رجعت غرفتي .. اخذت الجوال .. دقيت على حنونه .. من اول رنه رفعت

قالت : وينك انتي من متى ادق عليك

قلت لها : وعليكم السلام

قالت : انتي تنسين الواحد حتى يسلم .. وين كنتي ؟

قلت : كنت طالعه

قالت : اهاااا .. جودي بما ان حناماعندنا شي .. وفاضيين قلت اجي انام معك اسبوع

قلت بفرح : والله بتنامين معي .. وناسه .. مو مصدقه

قالت : لا صدقي .. خلاص بجيك بعد المغرب .. اوكي

قلت لها : لا تعالي الحين .. والله طفشانه

قالت : لا الحين ما اقدر

قلت : اوكي براحتك

قالت : يللا اشوفك بعد المغرب

قلت : على خير ان شاء الله
.
.
.

انا بصراحه ماقلت لها اني بشتغل بعد بكرا .. لاني ادري فيها بتغير رايها .. لفيت لقيت نايف وراي يصارخ : بوووووووووه

حطيت يدي على قلبي .. وقلت : نيوف خرعتني .. لا تسويلي كذا مره ثانيه

قال : خرعتك ؟ .. خلاص مره ثانيه مابسويها

دققت في ملامح اخوي نايف زين .. اشتقت لوجود نايف في البيت

انا ما وصفت لكم اخوي

امممممم اخوي وسيم وشعره بني فاتح مره طويل شوي يوصل لذقنه تقريباً وكثيف وناعم بشكل مو طبيعي .. كل شوي يطيح على عيونه ويرفعه .. شكلي بقول له يحلقه .. وجسمه طويل وعريض معظل

عيونه عسليه مناسبه للون شعره وبشرته بين البياض والسمار وهذا الشي هو اللي مخلي لون الشعر والعيون تطلع حلوه .. ويهتم بنفسه يعنيي لبسه على طول كشخه

سمعته يقول : وين رحتي ؟

قلت : امممم من وين جاي ؟

قال : من الشغل

حطيت يدي على راسي وقلت : ايه صح نسيت انك بتداوم اليوم

قال : امحق دوام .. قسم بالله طفشت ..مليون شغله تعلمتها .. وشلون مشعل متحمل الدوام كل يوم

قلت له : نايف ترى ابوي الله يرحمه .. وصاك بالشركه .. مو بكره تقول ما ابي اشتغل

انسدح على السرير وقال وهو مغمض : لا تخافين بداوم

تكتفت وقلت : ياسلام منسدح على سريري ومتلحف بعد .. روح غرفتك

قال : غرفتي بعيده .. تعبان مو قادر اقوم

رحت لعنده وهزيته : قــــــوم قــــــــوم .. مافيه تنام بغرفتي .. بتجيني حنان اليوم

مافيه رد .. راح بسابع نومه ..شغلت التكيف .. وطفيت النور .. وطلعت من الغرفه


...........................


__________
بيت مشعل .. الساعه 5:30 مساءً
__________


** رهف **

رجعت من بيت اهلي .. اول مادخلت شفت خالتي ام مشعل ورغد جالسين بالصاله .. يشربون قهوه ويشوفون التلفزيون

قلت : السلام عليكم

قالت : وعليكم السلام .. تعالي اجلسي معنا نشرب قهوه

رحت على طول وجلست .. قلت لها : تسلمين خالتي .. وترى تسلم عليك امي

قالت : الله يسلمها من كل شر .. ليه امك ماتجينا البيت

قلت لها : جات بس انتي كنتي مسافره

قالت : والله ابي اشوفها امك

صبيت لي قهوه .. وقلت : ان شاء الله بقول لها تجي هالاسبوع .. الا وين نجود

قالت : والله مدري الظاهر نايمه .. رغد غيري القناة عاد .. كله كرتون كله كرتون .. طفشنا

قلت : ايه والله .. حطو لنا شي حلو

ناظرتني رغد وقالت : لا والله واللي احطه انامو حلو

انا اصلاً وش لي اتكلم .. قالت خالتي : والله يارغد بنتي مانبي كرتون

قالت رغد : هذا الكرتون احبه وابي اشوفه

قالت خالتي : خلاص اجل خليه

لفت علي رغد ومدت لي لسانها .. وكانها تقول لي حره .. موتي قهر .. تحسب اني مهتمه لها.. قالت خالتي : فـــوزيــــه .. روحي شوفي من عند الباب

قالت رغد وهي تضحك : ماما فاطمه مو اسمها فوزيه اسمها فريزيانا

قالت خالتي : وانا شدراني .. بلا فوزنيانا .. بلا فرننزلانا

انا على طول مت من الضحك .. ناظرتني رغد وقالت : وش دخلك تضحكين معانا

قالت خالتي : وش هالكلام رغد .. تبين تمسكين الناس عن الضحك بعد

زين تسوي فيها خالتي .. شوي وتدخل حنان بنت عمة مشعل .. سلمت وجلست بالصاله

قالت لي : كيف حالك رهف

قلت : تمام وانتي

قالت : تمام ... تعالي رغوده

جات رغد وجلست بجنبها .. مسحت حنان على شعرها وقالت : وانتي كيف حالك ياحلوه

قالت : زينه ... تقول نجود انك بتنامين معانا

قالت وهي تناظر فيني : صحيح

وش دخلني تناظرفيني ؟

قالت : الا وينها جودي

قالت رغد :مدري الظاهر نايمه

قلت انا : بروح بشوفها

قالت خالتي : اذا نايمه صحيها

قلت : ان شاء الله

.
.
.

ركبت فوق .. فتحت باب غرفة نجود .. كانت نايمه .. رحت لعندها قلت بصوت خفيف : نجود .. نجود .. قومي .. حنان تحت

بس ماصحت ولا تحركت .. الظاهر نومها ثقيل .. هزيتها .. وقلت : نجود بتقومين اولا .. ترى بشغل النور

ماشفت منها أي رد .. هزيت كتفها وقلت : نجود يللا عاد قومي

مافيه فايده .. قمت وشغلت النور .. ورحت اشوف عطوراتها .. تحركت شوي .. شكلها صحت .. قلت لها : بجي برش عليك عطر .. ’’ رشيت في الهوا ’’ .. وقلت : الله ريحته حلوه

رجعت لعندها .. 1.2.3 .. صرخت بصوت عالي : نــــــــــجــــــــــــــــــود

انرفع الغطا على طول .. بس الشخص اللي كان موجود مو نجود .. قلنا بصوت واحد : بسم الله الرحمن الرحيم

قلت بخوف : م م من نانا ...... نـ ـ ـ ـ ـايف

رجعت على ورا بسرعه .. و من الخرعه طلعت من الغرفه وقفلت الباب .. وش يسوي نايف اخو مشعل .. بغرفة نجود ياربي وش هالفشله .. وش اسوي .. كله مني يوم جيت اصحيها .. اووف لو انا مخليه خالتي او رغد .. كنت واقفه عند الباب وحاطه يدي على قلبي .. سمعت صوت نجود وراي تقول : لا .. لاتدخلين نايف نايم بغرفتي

كان وجهي احمر ومتوتره .. قالت لي : وش فيك .. لا يكون دخلتي

قلت لها : ايه ... لا لا مادخلت .. انتي وين كنتي

قالت : كنت اتروش .. حنان بنت عمتي بتجي بعد شوي

قلت لها : ايه جات وهي تحت

وكنت بروح غرفتي .. قالت لي : مابتنزلين تجلسين معنا

قلت لها : الا بنزل .. بعد شوي

قالت: اوكي لا تتاخرين


.........................

_____________
بيت مشعل .. الساعه 5:40 مساءً
_____________


** نايف **

هذي رهف زوجة مشعل .. الظاهر حسبتني نجود .. لانها يوم صرخت قالت اسمها .. بس قسم بالله خرعتني ..اجل هي وش اقول مسكينه اكيد تفشلت .. اخر مره انام بغرفة نجود اذا هالمواقف بتصير .. خل اقوم اتروش واصلي احسن لي ..’’ رحت غرفتي تروشت وصليت وطلعت منها ’’

.
.
.

نزلت تحت .. كنت واقف بنص الصاله .. مافيه احد .. وين راحوا الناس ..سمعت صوت احد طالع من الحمام ( الله يكرمكم ) ناظرت .. من هذي .. ايه الهنوف بنت عمتي .. ناظرت فيني وهي متفاجأه.. وقالت : ولد خالي يجي من امريكا ومحد يقول لنا ؟

عادي يعني لو ماقالو لكم .. انا مو شخصيه مهمه !!

قالت : كيف حالك نايف

قلت : هلا الهنوف انا بخير

قالت وهي تتدلع بس دلعها ماعجبني : انا حنان مو الهنوف .. ماتعرف بنات عمتك

قلت : اها ...... ،، كنت بمشي ،،

قالت : وين رغد .. راحت فوق ومانزلت

لفيت عليها وقلت بملل : ماشفتها

قالت وهي تبتسم : حسبتها معك

قلت : لا مو معي

ورحت المطبخ .. قبل لا تقول لي شي ثاني ..وانا ابي اكل مو فاضي ..فتحت الثلاجه .. الله مسويين كريم كراميل .. اخذت لي من الكراميل .. وجلست على الطاوله اكل .. سمعت صوت برا .. وقفت ورحت عند دريشة المطبخ .. كانت هناك رغد .. بس معطيتني ظهرها .. ماكنت شايف هي كانت تلعب بوشو وقفت .. شكلها جايه تبي تدخل المطبخ .. تخبيت ورا الباب ..فتحته ودخلت بهدوء وهي تناظر يمين وشمال .. جابت كرسي .. وقربته عند الثلاجه .. ركبت فوقه .. وفتحتها ..اخذت تفاحتين وموزه ..نزلت من الكرسي .. وقفلت الثلاجه .. لفت وشافتني

قالت بخوف : خالي نايف

قلت لها : وش تسويين

قالت :جايه ابي اكل تفاح

قلت لها : نصابه تكلمي بسرعه

قالت : قلت لك ابي اكل

قلت بصوت عالي : رغد بلا كذب وقولي الصدق

نزلت راسها وقالت : ما اكذب

قلت : بتقولين الحين والا لا

قالت : بقول لك بس ما تعلم احد

قلت لها : ما اعلم

قالت : احلف

رفعت يدي وقلت : اتعهد بأسمي نايف ولد عبد العزيز .. اني ما اخبر احد عن اللي بتقولينه لي

قالت لي : تعال وراي

طلعت وراها من باب المطبخ .. رحنا عند الشجر .. رفعت كرتون كبير هناك .. كانت تحته قطوه صغيره

قلت لها : يوووه عندك قطوه

قالت : لا تقول لبابا

قلت لها : من متى عندك

قالت : وليد ولدعمتي جابها لي يوم يجي لنا

قلت : وليـــــدووه ماغيره

نزلت امسح على القطوه .. لفيت على رغد وقلت لها :رغوده وش راح تأكلينها

قالت لي : تفاح وموز

ابتسمت وقلت لها : لا ماتاكل هذا ... قومي معي

ورحت مع رغوده .. نجيب للقطوه حليب لانها صغيره


..........................


____________
بيت ابو يوسف .. الساعه 7:00 مساءً
____________

** محمد **

رهفوه هذي ماوراها فايده بذبحها .. قسم بالله اذتني .. الحين الريم تبيني اولا .. اموت واعرف .. لكن بتشوف رهفوه اذا تبي مني شي ماراح اسويه لها .. خلاص طفشت .. بقول لامي تخطبها خلاص .. ما اتوقع الريم ماتبيني .. لانها لو ماتبيني .. كان سوت سالفه على المسجات .. وتضايقت

.
.
.

طلعت من الغرفه .. ورحت الصاله .. كانت هناك امي تكوي الملابس

قلت لها : يمه

قالت لي وهي تكوي : هلا محمد وش تبي

قلت لها وانا احك راسي : يمه انا خلاص ابي اتزوج

تركت الكوي وقالت : خلاص يعني بتتزوج الريم .. هذي الساعه المباركه

جا سعد من المطبخ وقال : شفتي يمه قلت لك

وهذا مايخبي شي .. لفيت عليه وقلت : يابخورالبيت

قالت امي : انا ماصدقت سعد يوم قال لي .. لو ماقالت لي رهف كان للحين انا مو مصدقه

لا واثاري الكل هنا عارف السالفه .. وانا اخر من يعلم .. اما اخر من يعلم وانا صاحب الشآن

قلت : ايه يمه خلاص اخطبيلي الريم

قالت امي : الله يوفقك يا ولدي .. والريم مافيه احسن منها .. وانا من بكرا بكلم امها


................................


___________
بيت مشعل .. الساعه 9:00 مساءً
___________


** حنان **


رحنا الصاله انا ونجود وام مشعل بعد ماكنا بالمجلس .. صار لي 4 ساعات من جيت للحين .. ولا سويت ولا شي مفيد .. ونايف من دخل هالمطبخ ماطلع .. اوف مو حاله .. وهذيك الشينه رهف .. من شافتني ركبت فوق بحجة انها بتصحي نجود ومانزلت .. محتره مني .. جا مشعل من برا .. وسلم علينا .. جالسه اناظر فيه بتمعن .. هذا وش كان عاجبني فيه ؟..مافيه ولا صفه من الصفات اللي انا احبها .. فرق بينه وبين نايف

قالت نجود : مشعل عاد لا ركبت شوف رهف .. دخلت غرفتها وماطلعت خلها تنزل

قال : طيب بشوفها .. خلاص هذي هي نزلت .. رهف تعالي

جلس على كنبه من الكنب .. وجلست بجنبه رهف

قال لها : وش فيك يقولون دخلتي غرفتك وماطلعتي

قالت وهي تحط يدها على راسها : لا بس تعبانه شوي

وماتعبتي الا يوم انا جيت .. اعرفهم هالنوع من الناس .. يخافون اسرق منهم الاضواء .. وعشان كذا يسوون اي شي يلفت اللي حواليهم .. قالت تعبانه قالت .. توها يوم جيت مافيها شي

قالوا مشعل ونجود وخلاتي : سلامتك

قالت : الله يسلمكم

حسيت نفسي بس انا اللي ساكته وماقلت شي .. عشان كذا قلت : ماتشوفين شر

ايه بعد لا تقول محتره منها

قالت : الشر مايجيك

من سمعت صوت باب المطبخ .. لفيت على طول .. واخيراً جا نايف .. من متى انتظر

ناظرنا وقال : اشوف كلكم متجمعين .. وماتعزمون .. انا ورغوده مانكلمكم .. صح رغد

قالت رغد : ايه صح

قالت خالتي : اصلاً انت ورغد ماندري عنكم وين رحتوا .. تعال بس اجلس

جا وجلس .. وراحت رغوده عند ابوها

ابي اتكلم .. ابي اقول شي يلفت نظر نايف

قالت ام مشعل : رهف اذا مره تعبانه .. خلي مشعل يوديك المستشفى

قالت بصوت خفيف تسوي نفسها رقيقه : لا خالتي مايحتاج

قال نايف : وش فيها زوجة مشعل

حتى نايف يسأل عنها .. لا هذي ملفته نظر الكل هنا

قال مشعل : مافيها شي .. تعب خفيف

قال : ماتشوف شر

قالت رهف : الشر مايجيك

وقف مشعل وقال : انا بركب ببدل ملابسي دقايق وجاي

قالت ام مشعل : وانا بروح المطبخ بجهز العشا

مابقينا الا انا ونايف ونجود .. والخبله رهف .. لو تروح بعد هي احسن

قال نايف لنجود : جودي وين فيلم ( .. )

فرصتي اتكلم .. قبل ما يروح .. قلت : الله احب هالفيلم ..قصته حلوه

قالت نجود : ايه والله يجنن

الحين انا قلت هالكلام عشان يرد علي نايف .. او انتي يا الملقوفه

قام نايف يدور الفيلم بالمكتبه .. لازم انا افشل رهف والفت الانتباه لي بأي طريقه ..كانت دلة القهوه بجنب رهف .. ايه عندي فكره

قلت لها : رهف عاد صبيلي قهوه

اخذت فنجان .. وصبت لي .. عطتني ايه .. سويت كانها ماعطتني اياه زين .. وانكب على عبايتي .. شهقت بقوه .. عشان نايف ونجود يشوفون .. وقلت بدلع : يوووه رهف .. وش سويتي .. كبيتيه على عبايتي .. ياربي حار

حطت رهف يدها على فمها وقالت : مدري .. مانتبهت

جات نجود عندي وقالت : وش صار فيك احترقتي .. توصخت عبايتك

قلت انا : لا لا عادي بس احترقت يدي شوي .. حصل خير .. رهف ماتدري

نايف ماعلق .. بس التفت وشاف اللي صار وهذا يكفيني ..الحين اكيد نجود ونايف يقولون عن رهف غبيه

قالت نجود : بركب فوق .. بجيب لك عبايه ثانيه .. رهف قولي للخدامه تجي تمسح القهوه

قالت رهف : ان شاء الله

لف نايف .. واخيراً بيتكلم وبيعلق على اللي صار .. قال : نجود عاد في طريقك شوفي الفيلم وين راح .. يمكن في غرفتك .. او غرفتي

قالت نجود : طيب

انا في الشرق وهذيلا في الغرب




........................

** نايف **

ماكنت مهتم باللي يصير .. اللي يهمني فيلم ( .. ) وين راح .. ليكون
جودي عطته وحده من صديقاتها .. وخايفه تقول

اخذت فنجان قهوه .. وصبيت لي ..شربت شوي .. وبعدته على طول .. القهوه بارده .. غريبه .. ناظرت في حنان .. وكانت تمسح عبايتها بالكلينكس .. مو هي قالت انها احترقت ؟ .. ناديت خالتي ام مشعل .. فتحت باب المطبخ .. بس طلعت راسها

قلت لها : خالتي القهوه هذي من متى

قالت : سويتها العصر شربناها انا ورهف ورغد .. ونسيت اشيلها

معقوله رهف ماحست ان القهوه بارده .. وانها نفسها اللي شربتها بالعصر

قلت بصوت عالي : ايه خالتي غيريها لانها بارده

قالت لي : ان شاء الله ،، ورجعت المطبخ ،،

قالت حنان متفاجأه : بارده ؟ .. توها من شوي حاره

قلت لها بنظره حاده : لان القهوه تبرد بسرعه

ابتسمت وقالت : ايه صح

جات الخدامه تمسح القهوه .. وكانت رهف واقفه منزله راسها مستحيه

راقبت رهف شوي .. بعدين وقفت .. و ركبت غرفتي


.......................


____________
بيت ابو يوسف .. الساعه :2:00 مساءً
____________

** محمد **

كنت جالس على الكرسي اللي بغرفتي .. صار لي ثلاث ايام من قالولي امي وابوي .. ننتظر ردهم .. احسهم 3 سنين .. متى يعني .. مايبيله الموضوع كل هالوقت .. بس بيسألون البنت ..موافقه ؟؟ بتقول ايه اولا .. وينتهي الموضوع


~~قول امين عساك تحبني وتموت فيني
قول امين عسا يدينك ماتفارق يديني ~~

&رهف & يتصل بك

رديت وقلت : الووو

قالت : الووو هلا محمد

قلت : هلا والله رهف

قالت : هاه بشر .. ماعطوكم رد

قلت وانا مقهور : لا ماعطونا شي

قالت وهي تضحك : وش فيك .. مصيرهم بيردون عليكم

قلت : تأخيرهم هذا يخوف

قالت : لا يخوف ولا شي .. طبيعي الموضوع

قلت : ان شاء الله خير

قالت : ان شاء الله .. يللا اجل اخليك محمد .. واذا قال لك ابوي او امي انهم موافقين .. على طول دق علي

قلت لها : ولا يهمك

قالت باي وقفلت ..رميت الجوال على السرير فتحت الباب امي ..على طول وقفت قلت لها : اكيد عطوكم رد

قالت لي : وش فيك اجلس اجلس

قلت : عطوكم اولا

ماكنت مستانسه .. شكلها يخوفني .. قلت لها : قولي لي

قالت : ياولدي البنات واجد ..والريم فيه مليون مثلها

قلت بصراخ : ويعني .. ملخص هالكلام وشو

كانت ساكته .. قلت لها : قوليلي يمه .. لا تحرقين اعصابي .. قوليها .. قوليها خلاص عادي

قالت امي : مــحــمــد مـــا صــار نــصــيــب

^*^
/
\
/
\
/
\
/
\
/
^*^

**** نهاية الجزء العاشر ****




1- وش راح تكون ردة فعل محمد .. وهل راح ينسى الريم بسهوله ؟
2- وحنان راح توقف لهنا .. او في بالها مخططات ثانيه ؟
3- رهف تنتظرها مفاجأه كبيره .. ياترا وشهي ؟
راح نعرف كل هذا واكثر في الجزء الحادي عشر

...:::][ الجزء الحادي عشر ][:::...



____________
بيت ابو يوسف .. الساعه 3:00 مساءً
____________


** محمد **

امي تحسب اني بصدقها .. ادري فيها تمزح .. قلت لها : يمه تحسبين ما ادري انك تلعبي باعصابي

قالت بجديه : وهذا موضوع ينمزح فيه

قلت لها : اجل قولي الصدق

قالت : محمد الصدق ان البنت تبي تكمل دراستها .. خلاص هي مو من نصيبك .. انا بشوف لك بنت باخلاق وحلات الريم

امي ماتفهم اني ما ابي الا الريم .. ما ابي اتزوج غيرها ..ما اصدق ان الريم ماتبيني .. انا متأكد انها تبيني .. لاوالله الاصح اني كنت اقنع نفسي على طول انها تبيني

جلست على السرير وقلبي متحطم .. كل شي فيني متحطم .. ولا في حياتي حبيت .. او انعجبت في بنت .. حرام الايام تسوي فيني كذا

حطت امي يدها على كتفي وقالت : قوم ياولدي .. عادي مو نهاية الدنيا ..انا بخطب لك سماهر بنت عمك

قلت بصوت عالي : ما ابيها ما ابيها .. ماتفهمون انا ما ابي احد .. ابي الريم .. لازم توافق الحين ..كلميهم .. قولي لهم اني بخليها تكمل دراسه .. بخليها تسوي اللي تبيه

قالت : ما يصير هالكلام .. خلاص ماصار نصيب .. انا ما اقدر اسوي شي

دخل اخوي يوسف الغرفه ..فتح الدرج .. اخذ مفتاح سيارتي .. وجا بيطلع .. قلت له : هيه هيه انت .. وين سايبه الدنيا ولا سايبه

قال لي : وخر زين خلني اطلع

قلت له بعصبيه : طلعت روحك ..مضيع الغرفه انت .. تراك ماخذ مفتاح سيارتي كانك ماتدري

قال : ويعني .. سيارتي خربانه .. وانا ابي اطلع

قلت له : تحسب الناس فاظيه لك ..ماعندها شغله الا انت

قال ببرود : محمد رجاءً لا يكثر هرجك

في حالتي اللي كنت فيها .. ماحسيت بنفسي جلسنا نتهاوش .. وصلت هوشتنا للطق ..بس في النهايه يوسف اخذ مفتاح السياره وطلع .. وانا جلست بغرفتي بعذابي والمي وقهري


..................................


____________
بيت مشعل .. الساعه:2:30 مساءً
____________


** نايف **

جيت من الدوام تعبان .. دخلت المطبخ ابي اشرب مويه .. كانت هناك خالتي ام مشعل .. ورهف زوجة مشعل جالسه على الكرسي .. وكانت تسولف .. اول مادخلت انا سلمت .. ردت علي خالتي .. و وقفت رهف .. بتطلع

قالت لها خالتي :وين بتروحين ؟

قالت : بطلع بشوف نجود في الحديقه

قالت لها خالتي : بتطلعين بتشوفين نجود ولا عشان نايف دخل ؟ .. لا تستحين من نايف .. اعتبريه مثل اخوك يوسف او محمد

قالت وهي مستحيه: لا خالتي وش دعوه نايف مثل اخوي .. بس بطلع بشوف نجود .. يللا عن اذنكم

كنت اشرب المويه واناظر فيها وهي تطلع .. مو لهذي الدرجه .. تصدقون رهف اذا انا بالصاله ماتطلع من غرفتها .. واذا انا بالمطبخ ماتدخل .. او اذا انا برا ما تطلع .. تستحي مني مره .. وهالشي يقهرني مايخليني اخذ راحتي في البيت

قالت لي خالتي : نايف اخبار الشغل

قلت : امممم تمام .. اليوم فيصل داوم بالشركه

قالت : والله صدق

قلت لها : ايه .. تغديتوا ؟

قالت : ايه .. تبي احط لك غدا

قلت : ايه الله يطول لي عمرك

.
.
.

خلصت غدا ..وركبت غرفتي .. فتحت الدولاب .. طلعت لوح الرسم والالوان .. ماقلت لكم اني رسام ؟ .. الرسم من هواياتي غير الشعر بعد .. يوم كنت بالثانويه .. كانو يسموني شاعر الشله .. بنزل الحديقه برسم ..اخذت لوح الرسم وطلعت الحديقه .. كانت نجود جالسه مع رهف عند البركه يسولفون .. ناظرت لشكل البيت من برا .. كنت برسمه ..اخذت الالوان وتو ببدا بالرسم .. بس ناظرت لرهف وغيرت رايي .. ارسمها ؟ .. خلاص برسمها .. دققت في ملامحها ناعمه وحلوه ..المهم جلست ارسم وقربت اخلص .. اتوقع هالرسمه احلى رسمه رسمتها بحياتي .. بس مدري وش السبب اللي يخليني اقول كذا .. غيرت فيها شي واحد .. لون الحجاب .. كان ازرق ثقيل .. خليته وردي فاتح .. يناسبها هاللون


.......................



** حنان **


كنت جالسه اكلم امي في الجوال : ايه ماسويت ولا شي .. ونايف مايلتفت لي ابد .. ولا كاني موجوده

قالت لي : اذا انتي ماتسولفين معه .. وشلون بيكلمك

قلت : حتى ولو ما ابيه يقول اني قاطه عمري عليه .. وبعدين اسولف معه في وشو ؟

قالت : شوفي اهتماماته وشهي

قلت بضيق: اوووف ما اعرف عنه شي .. ولا ادري وش اهتماماته .. يدخل ويطلع .. ولاكانه يشوفني

قالت : يشوفك بس بدون ماتحسين له .. حتى من وراك يقول عنك حلوه

قلت بانفعال : والله صدق يمه .. قال عني حلوه ؟

قالت : ايه

قلت لها : وش عرفك

قالت : احساس الام مايخيب

صفعت على وجهي بقوه .. حسبته قال صدق .. اثاريه احساس امي اللي مايخيب

قلت : تصدقين يمه .. هاللي اسمها رهف .. تحاول تلفت اللي هنا باي طريقه .. صغيرهم وكبيرهم

قالت : لازم ماتسمحي لها .. من هي عشان تلفت انتبها الكل ؟ خربي عليها على طول لانك احق منها

قلت : هذا اللي اسويه .. بس اللي هنا يحبونها .. مافيه الا رغد ماتحبها

قالت : على الاقل معك وحده ماتحبها

قلت بقهر : يمه بزره

قالت : وهذا احسن شي

ناظرت وراي وقلت : يمه بخليك قبل لا يجي احد

قالت : طيب يا بنتي .. بس فتحي عقلك قبل ماتفتحين عيونك

قلت : ولا يهمك يمه .. يللا باي

قفلت وطلعت من غرفة نجود .. نزلت تحت ماشفت احد .. الظاهر جالسين بالحديقه ..طلعت وشفتهم عند البركه.. بس شفت نايف جالس يرسم .. تذكرت كلام امي يوم تقول شوفي اهتماماته .. الرسم من اهتماماته ؟ .. يعني من اليوم وطالع لازم ما اسولف الا عن الرسم .. تقربت منه .. حطيت يدي على فمي عشان ما اشهق .. ما تتخيلون الصدمه

نــــــــايف يـــــــــرســــــــم رهـــــــــــــــف ليــــــــــه ؟؟؟؟؟؟؟؟؟

هذي الحقيره انا احقد عليها .. اكرهها .. وش معنى هي اللي يرسمها .. ليه مارسم اخته ..او رسمني انا وحتى رسم الشغاله اووووف اكرهها .. اكرهها .. اكرهها
من زينها عشان يرسمها

رجعت على ورا ودخلت البيت .. جلست بالصاله .. وانا في قمة القهر .. جاتني رغد .. وناظرت فيني .. قالت لي : وش فيك جالسه لحالك

قلت وانا احس وجهي حار من العصبيه : مـــــقــــهـــــوره

قالت لي : من وشو

قلت لها : هذي رهف تلفت انظار الكل هنا

جلست وقالت : صحيح كلامك.. انا ما احبها

قلت لها : انا اكره اليوم اللي شفتها فيه

قالت : اجل انا وش اقول اللي عايشه معها في بيت واحد .. انا اتمنى لو انتي اللي عايشه معنا .. لاني احبك

قلت بأبتسامه : وانا اموت فيك .. واقدر اعيش معك في نفس البيت

قالت لي مستغربه : كيف تعيشين معنا ؟

قلت لها : اذا تزوجت خالك نايف

قالت بصوت عالي : صدق خالي نايف بيتزوجك

حطيت يدي على فمها وقلت لها : نزلي صوتك لاحد يسمعك .. ما ابي احد يدري .. وانتي لازم تساعديني

قالت : ليه اساعدك .. نايف مايبيك ؟

قلت لها بصوت اقرب للهمس : الا يبيني ويحبني .. وهو قال لي بيتزوجني

قالت : اجل وين المشكله

قلت : المشكله اني ما راح اعيش في هالبيت ورهف فيه

ناظرت فيني وسكتت

مسكت يدها وقلت لها : لازم انا وانتي نطلعها من هالبيت

قالت : وشلون ؟!

قلت :انتي ماعليك الا تطيعيني

ناظرت شوي فوق بتفكير .. وبعدين قالت : اتفقنا


.....................................

_____________
بيت مشعل .. الساعه : 3:00 مساءً
_____________


** رهف **


كنت جالسه اسولف مع نجود بالحديقه .. كانت تقول لي : بكرا بروح لصديقتي .. تصدقين تبي تشوفك .. من كثر ما اسولف عنك

قلت وانا مبسوطه : والله !! وش تقولين عني ؟

قالت لي : اقول كلام كثير

قلت : مثل وشو

قالت : اقول لها انك صغيره وحلوه .. تدرين يوم قلت لها انك اصغر مني .. حسبتني اتكلم عن زوجة نايف ههههههههه.. قلت لها نايف مو متزوج

سكت .. ماعلقت على كلامها ..شوي وقلت لها : اخوك رسام

عقدت حواجبها وقالت : كيف عرفتي ؟

قلت : مو هذا هو اللي جالس يرسم وراك .. جالس يشيل اغرضه .. شكله خلص

لفت وناظرت فيه .. قالت بصوت عالي : نيوف وش جالس ترسم

قال لها بنفس الصوت العالي .. لان كان فيه مسافه : ارسم السمكه اللي في البركه

قالت له : هاهاهاي تعرف تنكت

قال لها وهو رايح :متعلم التنكيت منك

لفت علي بسرعه وقالت : الحين انا انكت ؟

ضحكت وهزيت راسي يعني لا

مسكت يدها وقلت لها : جودي خلينا ندخل داخل .. وابي بعد اكلم بيت اهلي اشوف وش صار على محمد

قالت : محمد اخوك .. وش فيه ؟

قلت لها : خطب صديقتي .. والحين ينتظرون رايها

قالت : ان شاء الله خير .. ولو كان اخوك مثلك اكيد بتوافق صديقتك عليه

ابتسمت بحيا وقلت : ان شاء الله .. يللا قومي

.
.
.

دخلنا الصاله .. كانوا جالسين فيها .. حنان ورغد .. قالت نجود : حنانوه اخيراً صحيتي من النوم .. مو نوم هذا اللي عليك

قالت لها : اصلاً انا صحيت من زمان .. بس جالسه بالصاله

رحت اكلم من تلفون المجلس .. لاني عارفه ان الصاله بتصير ازعاج وماراح اسمع زين .. دقيت على بيت اهلي .. ردت امي .. قلت لها : هلا يمه .. اخبارك

قالت : هلا بنتي انا الحمد الله .. وانتي .. عساك بخير

قلت لها : دووم .. انا بخير .. هاه يمه بشري وش صار على محمد

قالت امي بصوت كله حزن : ماصار نصيب

قلت : يمه عاد لا تمزحين

قالت : والله العظيم .. قال ابوها البنت تبي تكمل دراستها

عمري ما انصدمت كذا بحياتي كلها.. معقوله الريم ترفض اخوي محمد .. سمعت صوت امي تقول : الووو

قلت لها : يمه عطيني محمد

قالت : هو في غرفته ماطلع منها .. اكيد كان بيطلع بس يوسف اخذ مفتاح سيارته

قلت بقهر: وهذا يوسف الغبي متى بيتأدب عن حركاته الماصخه .. مأذي خلق الله

قالت : وش اسوي انا تعبانه معاه

قلت : زين يمه انا ابي محمد .. لازم اكلمه الحين .. والا اقولك بدق على جواله .. مع السلامه

قالت لي : الله يحفظك

قفلت ودقيت على جوال محمد .. مايرد علي .. بس ماراح اخليه .. لازم اكلمه .. جلست ادق وادق ...واخيراً رد علي

قلت له : هلا محمد اخوي فديتك .. كيف حالك

قال ومن صوته واضح انه متضايق مره : انتي تدرين كيف حالي

قلت بتأثر: بس الريم تبيك .. صدقني .. هذا اللي شفته في عيونها

قال : وش بيفيدني كلامك الحين

قلت : وش فيه صوتك كذا

قال : رهف بطلب منك طلب

قلت بسرعه: اطلب عشره

قال : كلمي الريم

قلت : اكلمها وش اقول

قال : هي صديقتك وانتي متعوده عليها .. اساليها ليه رفضتني

قلت له : ان شاء الله

قال : الحين كلميها .. وردي علي

قلت : اوكي ..باي

قفلت ودقيت على الريم .. شكلي اليوم بجلس كل الوقت على التلفون .. ردت وقالت بحماس : هلا وغلا رهوفه

قلت لها ببرود : هلا .. كيفك

قالت بروقان : ميه ميه ولا فراخ الجمعيه .. وانتي

قلت : الحمد الله .. ريوم انتي اكيد عارفه انا بوشو ابي اكلمك

قالت : اممممم .. ايه عارفه .. عشان اخوك محمد .. صح

قلت وانا اتنهد بضيق : ايه

قالت : انا خلاص فكرت

قلت : فكرتي ؟؟؟ وش فكرتي

قالت : بموضوع محمد .. انا ماراح اشوف احسن من اخو صديقة عمري .. ومحمد ماينعاب

وش تقول الريم .. انا مو فاهمه عليها شي ؟ انتوا فاهمين ؟!! .. قلت : وش قصدك

قالت : رهوف لا تستهبلين معي .. انتي عارفه ان قصدي موافقه

قلت لها : موافقه على وشو

قالت : رهف عاد

قلت : لا جد مو فاهمه عليك

قالت بحيا : موافقه على محمد

لا الظاهر انا بجن ..لعبه هي .. ساعه ماتوافق وساعه توافق .. قلت لها : اجل ليه يوم جوكم اهلي يخطبونك لمحمد ماوافقتي

قالت وشكلها متفاجأه : متى جونا اهلك .. انتي مو طبيعيه اليوم رهف

قلت لها : لا حبيبتي انتي اللي مو طبيعيه .. اهلي جوكم عشان يخطبونك لاخوي محمد ..وبعدين قالولنا البنت ماتبي تتزوج تبي تكمل دراسه

قالت : قسم بالله اني ماقلت هالكلام .. وربي مدري ان اهلك جونا

قلت : من جدك ماتدرين

قالت : وربي

قلت : يعني اهلك اللي مو موافقين .. مو انتي

قالت : ومو هم اللي يقررون عني

قلت وكاني ارتحت شوي :كلمي امك او ابوك وشوفي

قالت : استحي وش اقول لهم

قلت لها : مدري ريوم .. ولو ماصار نصيب عادي .. مابيغير شي من اللي بينا لا تخافين

قالت وكانت متضايقه : طيب

قلت لها : الحين بقفل .. عشان بدق بقول لمحمد

قالت : اوكي باي

قفلت .. ودقيت .. قلت لمحمد كل اللي قالته لي الريم .. كنت احسب ان هالشي بيخفف عليه .. ان مو الريم اللي رافضته اهلها .. بس ماغير شي .. قفلت ورجعت الصاله .. جلست على الكنبه

قالت حنان : شكلها زوجة اخوك من النوع اللي 24 ساعه ماسكه التلفون

،،وش دخلك .. انا جالسه في بيتي .. حره امسك التلفون او ما امسكه ،،

قالت نجود : بالعكس اصلاًً ولا مره شفتها ماسكه التلفون

قالت رغد : عاد مو لدرجة ولا مره

طفشت من هالحوار .. وقفت وقلت : بركب بشوف مشعل .. صحى اولا


...................................


** مشعل **

صحيت من النوم .. وناظرت للساعه .. اوف الساعه 4 العصر .. نمت كثير .. اليوم ماعندي دوام .. ومن بكرا بيقل وقت دوامي .. لاني خلاص بصير موظف عادي .. قمت من السرير وفتحت الباب رهف

قالت لي : صباح الليل

قلت لها : صباح الخير

جلست على الكرسي .. وقالت : وش فيك هالايام .. يانايم ياطالع يا ....

قاطعتها .. وقلت ببرود : وش تبيني اسوي يعني ؟

ناظرتني وقالت : لا تسوي شي

قلت : اجل ليه قلتي كلامك اللي تو

طنشتني ولفت تناظر بالمرايا .. اخذت علبة الخاتم اللي كانت بجنب المرايا فتحته وتلمست الخاتم .. ولفت علي مبتسمه .. قالت : الله يهبل .. مره مره حلو .. انت ماخذه لي ؟

قلت لها : لا طبعاً ليه اخذه لك .. وش المناسبه ؟ .. هذا من عند امي لك

رجعته مكانه وقالت : اها

حكيت راسي وقلت لها : رهف انزلي شوفي وش العشا اليوم

قالت لي : عشا هالوقت ؟

قلت : أأأ روحي شوفي نجود صحت اولا .. لان ابيها في سالفه

قلت : ايه صحت .. كانت معي قبل شوي

قلت لها : طيب حطيلي غدا .. بنزل اتغدا بعد شوي


...............................


** رهف **

والله واضح انه يبيني اطلع من الغرفه بأي طريقه .. بس وش السبب ؟؟؟ .. لازم اعرف .. نزلت تحت .. رحت المطبخ حطيت له الغدا على الطاوله ..ورجعت الغرفه .. فتحت الباب .. ماشفت مشعل .. سمعت صوت المويه بالحمام (( الله يكرمكم )) .. اكيد جالس يتروش .. لفيت شفت باب غرفة المكتب .. اللي قلت لكم عنه انه دايم مقفل .. الحين شفته مفتوح للمره الثانيه

رحت عند باب المكتب .. شفت درج المكتب الاخير مفتوح .. وبجنبه اوراق منثوره

بروح بشوف هالاوراق .. تو بقرب .. الا اسمع صوت باب الحمام ينفتح .. نقزت لعند الكرسي .. وجلست

قلت له : غداك جاهز

قال : اوكي .. اسبقيني .. انزلي قبلي

قلت له : وليه انزل ؟ .. تغديت

قال : اها

اقول لكم يبي يطلعني من الغرفه بأي طريقه

فتح الدولاب .. وعطاني قميص .. قال لي : اكويه لي .. ولا ماتعرفين بعد تكوين

قلت له : لا والله طبعاً اعرف

ناظرني .. كانه يقول يللا اطلعي .. ليه جالسه

فهمت .. وطلعت على طول .. هذا مايستحي .. يطردني من غرفتي بطريقه غير مباشره

كويت له القميص .. ورجعت الغرفه .. فتحت الباب .. لقيته طالع .. قال لي : بنزل اتغدا .. حطيه على السرير

قلت له : طيب

طلع من الغرفه .. ودخلت انا .. حطيت القميص على السرير .. ورحت لعند غرفة المكتب .. فتحت الباب .. الحمد الله ماقفله

رحت لعند الدرج الاخير .. اللي كان مفتوح قبل شوي .. ماكانت الاوراق حواليه .. و حاولت افتحه بس كان مقفل .. شفت مفتاح على المكتب .. اخذته وجربته .. بس مو مفتاحه .. اجل مفتاح وشو ذا .. جربته على كل ادراج المكتب .. فتح واحد منهم .. كان فاضي مافيه شي .. قفلته ورجعت المفتاح مكانه .. اووف مستحيل مشعل يخليلي المفتاح .. اكيد اخذه معه .. بس انا بفتحه .. يعني بفتحه

.
.
.

نزلت تحت .. دخلت المطبخ .. فتحت الدولاب .. واخذت لي سكين بهدوء .. سمعت صوت احد يفتح باب المطبخ الثاني .. اللي يطلعنا على برا .. ما ابي الف اشوف مين .. اخاف مشعل .. او خالتي فاطمه .. وش اقول لهم ..ايه بقول لهم اطبخ .. اطبخ وش اسوي وانا ما اعرف .. لفيت .. لقيت نايف ورغد .. ايه الحمد الله دامهم هذيلا

ناظرت رغد في السكين اللي بيدي وقالت : بسم الله الرحمن الرحيم .. نايف شوف هذي بتذبحنا

وش اذبحهم .. ليكون هذيلا على بالهم انا مجرمه .. لازم اتكلم واقول شي .. قلت .. وكنت متوتره : لا بقص لي قطعة قماش .. وماشفت مقص

قالت : انا عندي مقص .. ولا اقول لا ماعندي .. خليك قصي بسكين احسن

رن جوال نايف .. حط يده بجيبه .. واخذ الجوال .. قال : الوو .. هلا فيصل .. انت عند الباب .. اوكي الحين بطلع

اخذت نفسي .. وطلعت من المطبخ .. ركبت فوق .. دخلت غرفتنا .. فتحت المكتب .. ورحت لعند الدرج .. جلست على الارض .. كنت بفتح الدرج مثل مانفتحه بالمفتاح .. بس الفرق اني بفتحه بالسكين .. حاولت وحاولت مافتح .. غريبه انا اشوف بالافلام .. يسوون كذا .. يعني مافيه طريقه .. الا اني اكسر الدرج .. دخلت السكين من تحت .. وظغطت عليها بقوه .. عورتني يدي .. بس جبت نتيجه .. اهم شي الدرج انكسر .. فتحته .. وش هذا .. اوراق شغل وخرابيط مالها أي اهميه .. لو عارفه كذا .. مافتحت هالدرج .. شفت من بين الاوراق صوره .. اكيد صورة زوجته الاوليه .. بعدت الاوراق ورفعتها .. فتحت عيوني بأقوا ماعندي عشان اصدق اللي شفته


صــــــــــورة خــــــــــالــــــد ؟؟؟؟؟؟؟؟!!!!!!!!!!


.............................

_________________
بيت الريم .. الساعه : 5:00 مساءً
_________________

** الريم **

كنت جالسه بالصاله .. اراقب كل تصرفات امي .. ابيها تقول لي ان محمد جا خطبني .. لازم اكلمها بهذا الموضوع .. ما ابي محمد يشوف بنت غيري

قالت امي : ريوم

واخيراً .. قلت لها : هلا يمه .. امري

قالت : قومي طفي على قدر الشوربه .. نسيته على النار

وش هالحاله .. قمت طفيت عليه ورجعت جلست .. قلت لها : وبعد

قالت : وش وبعد

قلت : يعني ماتبين تكلميني بموضوع .. شي

قالت : لا ابد

لازم اتكلم .. ولا امي مستحيل تتكلم .. قلت لها : يمه اخو رهف جا خطبني ؟

قالت لي بتوتر : وش عرفك

قلت لها : رهف قالت لي .. انتو ليه ماقلتولي .. يمكن انا موافقه

قالت امي بحزن : والله يابنتي .. انا مره كنت مبسوطه يوم جا خطبك محمد .. لان ماراح نلقى احسن منه

قلت لها : طيب وبعدين .. ابوي ما وافق

قالت : لا .. تدرين .. قربي شوي بقول لك عشان ماحد يسمع

قربت .. وقلت : قولي

قالت بصوت خفيف : ابوك كان عادي .. مو قايل شي .. بس خالد وشوشه شوي .. قال له انه يعرف يوسف .. ويوسف هذا مو لهناك

قلت لها : وش دخلنا بيوسف .. هواللي خاطبني وانا مدري .. وبعدين لا يتكلم هالغبي عن اخو صديقتي

قالت : مدري .. وخالد قال لابوك .. انك تبين تكملين دراسه .. وان مايناسبك الا ولد عمك

اثاري كل شي من خالد .. هو اللي وشوش ابوي .. من جد ملقوف انا ما ابي ولد عمي .. حقدت على خالد مره

قالت لي امي : يعني انتي لو شاورناك كنتي بتوافقي ؟

قلت لها .. بتوتر : انا .. وشو .. لا طبعاً

ضحكت وقالت : والله انك نصابه .. اجل ليه مكلمتني

قلت لها : لان

قالت : بس بس .. عرفنا .. تدرين انا من زمان خاطري اشوفك عروس .. واشوف عيالك .. اذا تبيني اكلم ابوك .. بكلمه عادي .. لان ابوك ترى كان عادي بيشاورك ويمكن يوافق

قلت لها وانا مبتسمه: .. والله يمه بتكلمين ابوي

قالت امي وهي تضحك: موتو تقولين لا !!


....................................


___________________
بيت مشعل .. الساعه : 5:00 مساء
____________________


** رهف **

وش تسوي صورة خالد .. بدرج مكتب مشعل .. ياربي احس بخوف .. قلبي يدق بقوه ..راسي بدا يوجعني .. ما ابي افكر بشي .. وانا الخبله كسرت درج المكتب .. لو عرف مشعل .. وش بيسوي فيني .. هو بدون شي مو متحملني هالايام .. برتب الاوراق .. وبرجع الصوره مكانها .. ’’ رجعتهم بسرعه .. وقفلت الدرج .. مو واضح انه مكسور .. ان شاء الله مايلاحظ مشعل .. ان شاء الله يارب .. كنت بطلع .. تذكرت السكين .. بطلع غبيه لو نسيتها .. اخذتها .. وقفلت باب المكتب .. وطلعت من الغرفه اركض .. وصلت المطبخ بأمان ..محد شافني .. حطيت السكين مكانها .. ورجعت الغرفه .. انسدحت على السرير .. وغطيت نفسي .. فتح شخص الباب .. شوي وسمعت صوت مشعل يقول : رهف .. نايمه

من كلمني .. دقات قلبي زادت .. مدري ليه انا خايفه .. مو بس خايفه .. الا بموت من الخوف

مارديت عليه .. عشان يحسبني نايمه ويروح

كنت مغمضه عيوني بقوه .. سمعت صوت باب الغرفه يتقفل .. قمت على طول .. اشوه طلع .. اموت واعرف وش علاقة مشعل بخالد .. وليه مشعل قال لاهله اني صديقة نجود بالدراسه .. ياربي وش هالانسان الغامض


.............................


** حنان **

طفشت في هالبيت .. لانايف معبرني .. ولا حتى نجود راحت بيت صديقتها.. عشان تعلمها اشياء تخص الشغل .. لا المشكله تقول لي اجلسي مع امي ورهف على ما اجي هذا اللي ناقص اجلس معهم وحده غبيه ووحده عجيز وانا جالسه بالصاله .. مع هالبزره الغبيه .. وجعت راسي من السوالف .. وياليتني معاها .. ماسمعت الا اخر كلمتين قالتهم : واخذت السكين وطلعت

قلت لها بملل : مين اخذ مين

قالت : حنان صار لي ساعه اقول لك السالفه

قلت لها : معليه حبيبتي عيديها

قالت : انا ونايف كنا جايين من برا .. شفنا رهف ماخذه سكين .. صدقيني تبي تذبحنا

قلت لها : كان سألتوها وش بتسوي فيها

قالت : سالتها .. قالت بتقص قماش .. بس كانت خايفه وهي تقولها .. لان بالله عليك فيه وحده تقص قماش بسكين

قلت لها : ونايف وش قال

قالت : نايف ماقال شي .. لان دق عليه فيصل .. وعلى طول طلع

قلت لها : وهي وين راحت

قالت : شفتها راكبه فوق

قلت لها : يوم هي ركبت فوق .. نايف وين راح ؟

قالت : اووف حنان قلت لك طلع

ابتسمت ومسكتها .. قلت لها تعالي معي .. رحت المطبخ .. فتحت الدولاب .. قلت لها : أي وحده السكين اللي اخذتها

قالت لي : ما اشوف

رفعتها .. وقلت لها .. والحين

قالت : ما اعرفها

قلت لها : لازم تعرفيها

قالت : ايه ايه .. هذيك .. اكبر وحده

اخذت السكين .. وقلت لها امشي قبلي .. لاني ما بأي احد يشوفني

مشت رغد ومشيت وراها .. ركبت الدرج .. قلت لها بصوت هامس : فيه احد فوق

قالت لي : لا مافيه احد

واشرت لي عشان اجي .. دخلنا غرفة نايف .. وقفلنا الباب بالمفتاح

جلست على السرير وقالت لي : وش بنسوي

حطيت السكين بجنبها .. وقلت : الحين تشوفين

فتحت الادراج .. ماشفت شي .. نزلت اشوف تحت السرير .. ماشفت شي .. فتحت الدولاب جلست ادور بعد ماشفت شي .. رفعت القميص اللي بالدولاب .. شفتها .. اللوحه اللي رسمها نايف لرهف .. رحت لعند السرير .. حطيت اللوحده وحاولت اشقها بيدي عشان اتأكد .. وطبعاً هي سميكه و ما انشقت .. اخذت السكين .. وشقيت اللوحه

حطت رغد يدها على فمها وقالت : حنان شقيتي اللوحه

ابتسمت وقلت لها : لا مو انا اللي شقيتها .. رهــف اللــي شــقــتــهــا

^*^
/
\
/
\
/
\
/
\
/
^*^

**** نهاية الجزء الحادي عشر ****

...:::][ الجزء الثاني عشر ][:::...

____________
بيت مشعل ..الساعه :30 مساءً
____________

** مشعل **

كنت جالس بالمجلس .. ماعندي شي .. ورهف نايمه .. اكيد احد مضايقها .. ولا هي ماتنام بهالاوقات .. الا اذا كانت متضايقه .. شغلت التلفزيون .. وجلست اشوفه شوي .. قفلته وطلعت من المجلس .. شفت نجود فاتحه باب الصاله

قالت : السلام عليكم

قلت : وعليكم السلام .. هلا نجود .. وين كنتي ؟

قالت وهي تفصخ العبايه : كنت في بيت صديقتي .. وين البنات ؟

قلت لها : والله مدري انا كنت بالمجلس

قالت : رهوفه في بيت اهلها ؟

قلت لها : لا نايمه .. بركب بشوفها صحت اولا


.
.
.


فتحت الباب .. ودخلت الغرفه .. للحين رهف نايمه ؟ .. لفت ناظرتني .. ورجعت بسرعه .. قلت لها : صاحيه

ماردت علي .. رحت لعندها .. قلت : صاحيه

قالت : ايه

قلت لها : اجل قومي .. وش فيك طول الوقت منسدحه

قالت : بس كذا راسي يوجعني

قلت لها : والله كيفك ..المهم انا بطلع

ماردت علي .. اخذت القميص اللي كوته لي .. ولبسته .. وطلعت من الغرفه .. شفت رغد وحنان بنت عمتي .. يدخلون غرفة نجود .. قلت : رغوده تعالي

جاتني بسرعه .. نزلت لعندها و بستها .. قلت لها : كيف حال رغودتي اليوم

قالت لي : بخير

قلت لها : يللا حبيبتي .. قولي لماما فاطمه تبدل لك ملابسك .. عشان باخذك بنطلع ونتعشا سوا

قالت : ان شاء الله بابا

رجعت الغرفه عشان باخذ مفتاح السياره .. شفت رهف .. جالسه على السرير ومغطيه نفسها .. ناظرت فيها شوي ..واخذت المفتاح وطلعت

...............

** نايف **

فتحت .. باب الصاله .. ودخلت .. لقيت مشعل ورغد في وجهي

قلت لمشعل : طالعين ؟

قال : ايه

قلت : وجودي جات

قال : ايه

قلت : الظاهر فيه دوامات في الطلعه .. ناس تجي ناس تطلع

قال : ايه

ماعنده غير كلمة ايه ؟

قال : كنت مع فيصل

قلت له : ايه

قال : تعشيتوا

قلت : ايه

قال : يللا عن اذنك

قلت له : ايه

يللا دام كلمة ( ايه ) موضه .. بستخدمها على طول من اليوم وطالع .. المهم طلع مشعل مع بنته ..رحت المطبخ .. وحطيت كيس العشا اللي بيدي على طاولة المطبخ .. وطلعت من المطبخ ركبت فوق .. رحت لعند غرفة جودي .. وطقيت الباب ..ودخلت

قلت : السلام عليكم

ردت نجود السلام

سمعت صوت حنان تقول : كيف حالك نايف

تصدقون ما انتبهت لها .. قلت : نحمد الله .. المهم جبت لكم عشا من برا .. انزلوا تعشوا .. وشوفوا بعد رهف زوجة مشعل .. اذا تعشت اولا .. اوكي

قالت نجود : ان شاء الله

قالت حنان : تسلم على العشا

قلت وانا طالع : الله يسلمك

طلعت .. ورحت غرفتي .. فتحت الباب .. وانسدحت على طول على السرير .. نعسان شكلي بنام .. لا وش انام توها الساعه 9 .. بقوم ابدل ملابسي

قمت من السرير.. رحت لعند الدولاب .. حسيت لنفسي ادوس على شي .. نزلت راسي ..شفت لوحة رهف اللي رسمتها .. او بالأحرا اجزاء من اللوحه ..لانها كانت مشقوقه .. واحد شقها متعمد .. نزلت واخذت جزء من اللوحه .. وجلست افكر .. تتوقعون مشعل دخل غرفتي وشاف اللوحه وشقها ؟ .. مسكت السكين اللي على الارض .. السكين هذي انا شفتها قبل شوي في مكان .. وين ياربي .. صح تذكرت

^*^
/
\
/
\
/
^*^

*- بسم الله الرحمن الرحيم .. نايف شوف هذي بتذبحنا

- لا بقص لي قطعة قماش .. وماشفت مقص

*- انا عندي مقص .. ولا اقول لا ماعندي .. خليك قصي بالسكين احسن

^*^
/
\
/
\
/
^*^

رهف شقت اللوحه ؟؟؟؟؟ .. من غبائي لو كنت ادري هالشي بيصير .. كان مارسمتها ..اصلاً وش دخلني فيها ارسمها .. هي ماتركت السكين واللوحه كذا .. الا عشان تنبهني وتعطيني خبر اني ما احاول ارسمها مره ثانيه .. احس بالقهر يسري بدمي

من القهر ..اخذت السكين وجلست اشق في اللوحه اكثر


.....................

_____________
بيت الريم .. الساعه :00 مساءًً
_____________


** الريم **

كنت جالسه بغرفتي .. امشط شعري .. واسمع اغنية تامر حسني نور عيني

.
.

حبيبي تعالى .. بناديلك

تطمني

تريحني

ماتسيب ايدي من ايدك

***

ماتبعد عني ولا ثانيه

احضني نسيني الدنيا

واوعدني طول ما انت معاي

ماتسيب ايدي من ايدك
.
.

فتحت امي الباب .. طفيت الاغنيه على طول

قالت : ريوم كلمت ابوك

قلت لها : والله يمه .. وش قال

قالت : قال ماكنت متوقع ان الريم موافقه على محمد .. ولو هي موافقه انا بعد موافق

وقفت وقلت وانا مبسوطه : ما اصدق ابوي قال كذا

قالت : قلت لك انا .. ابوك عادي عنده ..لو ما خالد وشوشه

قلت : زين يمه .. والحين

قالت : والله مدري الرجال راح خلاص .. وتلقين شافوله وحده غيرك

ما اتوقع .. لان كلام رهف وضح لي .. ان محمد يبيني انا .. ولو كان يبي غيري .. ماكانت رهف كلمتني من اساس

قلت لامي : طيب يمه الحين انا بنام .. وان شاء الله مايصير الا الخير

قالت لي امي : تصبحين على خير

قلت لها : وانتي من اهله

طلعت .. وعلى طول على التلفون .. عشان اخبر رهف باللي صار


..................................

___________
بيت مشعل .. الساعه 00 مساءً
___________


** رهف **


قفلت من عند الريم .. ودقيت على اخوي محمد

رد علي .. قلت له : الووو.. هلا محمد .. اخبارك

قال : تمام .. اكيد عندك شي مهم

قلت له : طبعاً .. كم تدفع

قال : رهوف خلصينا

قلت له : عادي عندك تروح تخطب الريم مره ثانيه ؟

قال : لا طبعاً .. اذا هم مايبوني اروح ليه !

قلت له : ولو قلت لك ان الريم واهلها موافقين .. تروح او لا

قال بأندفاع : اروح مره ومرتين .. وثلاثه بعد

قلت: خلاص اجل مبروك من الحين

قال : وليه مستعجله .. والله ماتدرين وش تخبي لنا الايام

قلت : ان شاء الله ماتخبي لنا الايام الا الخير يااخوي .. يللا غلاي الحين انا بخليك

قال : اوكي وتسلمين يا احلى واغلى واعز اخت

قلت وانا اضحك : كل هذا عشان كلمت الريم

قال : لا يا الدبه من قال

قلت : انا قلت .. يللا باي

قفلت من عند محمد .. وانا للحين على السرير .. كنت بقوم بس سمعت صوت مشعل برا ..رجعت انسدحت .. شكلي بجلس طول يومي على السرير .. فتح الباب .. وقال : بل .. رهف للحين انتي منسدحه على السرير ما مليتي

سويت حالي نايمه .. ومارديت .. جا لعندي .. وقال : نصابه مو نايمه

قلت وانا مغمضه : مشعل خلني ابي انام

قال : طيب انتي وش فيك

قلت : مافيني شي

قال : بتقولين قولي .. مابتقولين خلاص .. ترى انا ما ادلع احد

قلت له : طيب وقلت لك مافيني شي

دخل الحمام (( الله يكرمكم )) .. و بعد ماطلع جا انسدح على السرير

امممممم الحمد الله انه انسدح .. خل ينام ويفكني .. شكله مابيقول لي عن خالد شي

قال : بقول لك رهف

لفيت عليه وقلت : لا .. لاتقول لي ما ابي اعرف

رفع حاجب وقال : وش اللي ماتبين تعرفينه ؟

ايه صحيح .. وش جالسه اخربط انا .. الحين اكيد يقول انا انهبلت .. لازم ارقع .. قلت له : قصدي كان فيه موضوع .. في بالي وحسبتك بتقول لي عنه .. وانا اعرفه .. يعني مايحتاج تقول

قال : طيب وش الموضوع اللي تعرفينه ؟

ياربي توهقت .. قسم بالله ولا كلمه قلتها تطلع من وحده صاحيه

قلت له : مو مهم .. مو مهم .. وش اللي كنت بتقوله

قال :انا كنت بس بقول تعشيتي اولا

قلت : لا ماتعشيت .. مالي نفس

قال : براحتك .. تصبحين على خير

قلت : وانت من اهله

مافيني نوم .. اصلاً ليه الخوف .. انا ماسويت شي .. انام احسن لي


____________
بيت ابو يوسف .. الساعه: 10:00 مساءً
____________


** محمد **

.
.

ثلاث ايام مرن في حياتي غير

ثلاث ايام عشت الحب واغليته

ثلاث ايام واتهجا كلام الطير

كلام اعذب من اعذب من تفديته

.
.

تدرون ليه اغني اغنية عبد المجيد ثلاث ايام ؟ .. باركولي .. باقي ثلاث ايام على ملكتي ..صدقت رهوف يوم تقول .. ان شاء الله مابتخبي لنا الايام الا الخير .. وهذا انا الخير اشوفه بعيوني .. الحمد الله ان الريم صارت من نصيبي .. هذا اسعد شي بيصير في حياتي كلها .. فتح باب غرفتي سعد .. وهو ماسك بيده بدلته .. حفظت كل شي فيها من كثر ما اشوفها .. حطها على السرير .. وقال : محمد هذي البدله اللي بلبسها في ملكتك .. حلوه ؟

قلت له : كم مره سألتني

قال : صحيح سالتك بس ماجاوبتني

قلت : الا جاوبتك .. وقلت لك ابيك تلبس ثوب وشماغ

قال : لا في عرسك بلبس ثوب وشماغ

قلت له : طيب

قال : ومتى انا بعرس

قلت له : وين انت باقيلك دهر .. بس لاتخاف .. مابتصير اخر من بيعرس في هالبيت .. لانك بتعرس قبل يوسف

قال : بل .. يوسف كبر ابوي .. واعرس انا قبله

اخذت جوالي .. ودقيت على رهف

ردت على طول : الووو هلا محمد

قلت : هلا رهوف .. وش هالازعاج اللي عندك

قالت بصوت عالي : محمد ما اسمعك

رفعت صوتي وقلت : اقولك وش هالازعاج اللي عندك

قالت : انا في السوق مع الريم .. ناخذ اغراض للملكه

قلت: سلمي عليها

قالت : يوصل

قلت : يللا اخليك .. باي

قفلت .. وناظرت في سعد .. لقيته يبكي .. قلت له : وش فيك سعودي تبكي ؟

قال : الحين رهف تزوجت وخلتني .. وانت بتتزوج وبتخليني .. انا ما ابي اجلس في البيت مع يوسفوه كله يطقني

مسحت على راسه وقلت : انت على بالك بملك وبعرس على طول .. لا حبيبي شارطين علي اخليها تخلص ثانويه .. يعني باقي وباقي

قال : احسن .. اجل انا بروح بوري امي بدلتي

مسكته وقلت : وشلون توريها .. وهي اللي اختارتها لك

قال : لا تلقاها الحين نست .. لان امي بسرعه تنسى

وهذا اللي بيموتني ضحك الحين


...........................

____________
بيت مشعل .. الساعه :30 مساءً
____________

** نايف **

طلعت من غرفتي .. وكنت بدخل غرفة نجود .. تذكرت ان ممنوع علي ادخل هالغرفه .. رهف صار لها كم يوم تنام فيها.. مدري وش السبب .. ماسألت .. اصلاً انا من سالفة اللوحه .. صرت اتجنب رهف اكثر من اول .. كنت بنزل الدرج .. بس شفت حنان تدف شنطه كبيره .. الظاهر بترجع بيتهم خلاص .. بصراحه زودتها .. من زمان وهي في بيتنا

قلت لي بدلع : هلا نايف .. مساء الخير

قلت : هلا بنت عمتي .. مساء النور

قالت : نايف ممكن تنزل لي الشنطه

عقدت حواجبها وكملت كلامها : لاني خلاص برجع البيت

اخذت الشنطه .. ونزلتها مع الدرج

وانا انزل كنت افكر .. من اول ماجات حنان بيتنا ماشفتها تجلس مع رهف لحالهم .. يمكن حتى رهف ماتستلطفها

مسكت حنان شنطتها وقالت : نايف

قلت بدون ما اناظرها : هلا رهف

يوم ماسمعت ردها .. لفيت عليها وقلت : امري ؟

قالت بعصبيه : انا بنزل الشنطه

رفعت كتوفي وقلت : براحتك

هي اللي طلبت مني انزلها مو انا اللي طلبت منها

مشت عني وقالت : اسمي حنان مو رهف

ادري ان اسمها حنان .. غريبه ليه تذكرني ؟

سلمت حنان على امي ونجود .. اللي كانوا جالسين بالصاله .. وطلعت

رحت انا جلست معاهم

كانت جودي تقول :رغد وحنان يقولون يمكن مجنونه

قالت خالتي : بسم الله عليها الرحمن الرحيم

قالت جودي :خالتي انا اقول .. يمكن هي فيها عقده نفسيه من يوم كانت صغيره ..صار لها موقف مع القطاوه ولا شي

قالت خالتي ام مشعل : لا غلطانه .. بنتي مافيها شي .. هذي احلام تجيها .. يقولون الاحلام اللي عن القطاوه مو زينه

قالت نجود : خالتي فيه وحده تحلم ثلاث ايام تقريباً نفس الحلم

قلت انا : احم احم انا هنا

قالت خالتي : هلا وغلا ولدي .. كيف حالك

قلت : تمام .. وش هالموضوع المهم .. اللي يخليكم ماتنتبهون لوجودي

قالت نجود : اهم واغرب موضوع صار في هالبيت

قلت انا : وش الموضوع

قالت خالتي : رهف زوجة مشعل .. صار لها ثلاث ايام .. تشوف في غرفتها قطوه .. وتخيل عاد .. لا رحنا حنا مانشوف شي .. تختفي هالقطوه .. والمشكله اذا مشعل كان معها ماتجي هالقطوه .. يعني معقوله مافيه الا هي تشوفها

كملت نجود :حتى خالتي قالت يمكن هالقطوه جني يطلع لرهف .. صارت رهف ماتقدر تجلس في الغرفه .. ماتطبها خير شر .. تخاف منها .. تجي تنام في غرفتي .. وهي نايمه تصحى فجأه .. وتقول لي قفلتي الدريشه عدل .. قفلتي الباب زين .. وماتحلم الا في القطاوه

من قالت كذا على طول وقفت .. وقلت بصوت عالي وبكل عصبيه: رغـــــــــــد .. رغـــــــــــد

نزلت رغد من فوق .. وقالت : نعم خالي

صفعتها كف ..وشديت شعرها .. صرخت عليها : تعالي معي

قالت خالتي : اترك رغد

قالت نجود : نايف مجنون

ماطاعت رغد تجي معي .. بس انا سحبتها من شعرها

سمعت صوت مشعل يقول بصوت عالي : شيــل يــدك عن بنــتي ^*^
/
\
/
\
/
\
/
\
/
^*^

**** نهاية الجزء الثاني عشر ****

...:::][ الجزء الثالث عشر ][:::...


____________
بيت مشعل .. الساعه :30 مساءً
____________



** نايف **


طنشت مشعل ولا كاني اسمعه .. جاني وسحب يدي .. بس انا ماتركت شعرها .. رهف جات على طول من سمعت الصوت وصارت هي ونجود وخالتي ملتمين حولي

قال مشعل : اذا انا ابوها ماطقيتها .. تجي انت تطقها

تركت رغد وجلست اصفق : حلو حلو .. مشعل لا تجلس الحين تعطيني الدروس المستفاده في الابوه .. شوف بنتك وش مسويه

قالت رغد وهي تبكي : انا ماسويت شي

قلت : لو فيك خير تكلمتي

مسكتني خالتي ام مشعل .. وقالت : استهدي بالله ياولدي

قالت نجود : تعوذ من الشيطان نايف ..وقول لنا وش فيك

مسكت رغد بسرعه .. ورحت للمطبخ اركض .. الكل كان يركض وراي .. طلعت من باب المطبخ الثاني .. ورحت لمكان القطوه اللي ورتني اياها رغد .. قلت .. وكنت اصارخ : رهف هذي القطوه اللي كنتي تشوفينها

هزت راسها يعني ايه .. حطت نجود يدها على فمها .. مسكت خالتي ام مشعل رغد .. وقالت : نايف لا تطقها خلاص

قال مشعل : عفيه .. يللا كلكم حيوه .. مسوي هالحركات قدام الكل .. عشان نقول عنه بطل .. وش دخل بنتي اذا القطوه راحت الغرفه.. ليكون تتحكم عنها بريموت كنترول

قلت انا : شيء عجيب .. رهف بس اللي تشوفها

قال : وش دخلك هذي بنتي وهذي زوجتي

قلت ببرود : على العموم هالقطوه ماتجلس في البيت

قال مشعل : بس هذي قطوة بنتي يعني تبيها

تكتفت وقلت : والله لو كنت ناسي ترا هالبيت بيتي .. وانا ما ابي فيه قطاوه .. وبنتك غلطانه واعترف بهالشي

سحبت رغد يدها من يد خالتي ام مشعل .. وقالت بصوت عالي : عمي نايف وعدتني ماتقول لاحد عن هالقطوه .. انت كـــــــذاب كـــــذاب

وراحت تركض .. اخذت نفسي انا بعد .. وركبت غرفتي لاني مره متضايق .. دخلت وقفلت الباب .. سندت ظهري عليه .. وجلست افكر .. انا ليه سويت كذا .. عشان الحق .. او لاني موراضي على رهف ؟؟!!



..............................


** رهف **


ركب مشعل ..وركبت وراه ..على بالي بيدخل الغرفه .. بس مادخل ..راح لرغد .. كنت انا عند الباب .. شفته يحضنها ويبوسها .. اول مره اشوف احد يراضي شخص غلطان !! ..زين يسوي فيها نايف .. الحين اكيد كل اللي في البيت شمتان فيها .. بس وحده بعمر رغد .. ماتخطط وتسوي اللي سوته لحالها .. اكيد معاها احد .. ومو بعيد هالاحد يكون حنان .. لاني سمعتها تقول لنجود اني مجنونه واتخيل قطاوه و نفس الكلام قالته رغد ..ما احبها انا هالحنان .. زين انها رجعت بيتهم .. طولت معانا

المهم رجعت غرفتي .. بدلت ملابسي وجلست على السرير .. دخل الغرفه مشعل .. وجلس هو بعد على السرير وكان معصب

كنت بقول له ..حصل خير ومافيه داعي لهالعصبيه

قلت : مشعل حــصـ...

قاطعني وقال : رهف رجاءً لا تكلميني .. مالي خلق اسمع صوتك .. اللي فيني كافيني

قلت له : الحين بتحط الحره فيني

صرخ في وجهي : اقولك اسكتي ما ابي اسمع صوتك .. ماتفهمين

قلت : لا ما افهم

حط يده على المخده .. وشالها .. مدري وش كان بيسوي .. بيرميها علي والا وشو بالضبط

قال : نامي .. لا تجلسين تناظريني كذا

لا هذا الظاهر بينيمني على كيفه .. وبيصحيني على كيفه

قلت : ما ابي انام

وقف وقال : ياتنامين .. ياتبلعين لسانك .. كلش مو فاضيلك

سكت عنه .. انسدح على السرير .. وكان يهز رجوله طول الوقت .. كل هذا من العصبيه .. انسدحت ونمت انا بعد


_____________
السياره .. الساعه 8:00 صباحاً
______________



** فيصل **


كنت رايح بيت نايف عشان نطلع نفطر سوا .. وصلت بيتهم .. ووقفت السياره برا في الحديقه ..دقيت على جواله

رد علي :الووو هلا فياصل

قلت : هلا نيوف .. انا برا

قال : دقايق وبجيك

قلت : طيب باي

طلع من البيت هو ونجود .. قال : فيصل انتظرني لحظه بجيب القطوه معي .. عشان نوديها مكان بعيد .. تعرف يعني القطوه لا تعودت على بيت ماتفارقه

قالت نجود : خلاص بتودوها القطوه .. حرام .. حتى لو رغد غلطانه بس هي تبيها

قلت انا : اي قطوه

قال نايف : هذي القطوه في البيت من زمان .. بعدين اقولك السالفه .. بروح بجيبها

راح نايف .. وكانت نجود واقفه

قلت لها : كيف حالك نجود .. عساك طيبه

قالت : طيبه الحمد الله .. وانت

قلت : دووم .. انا تمام

سكتت وجلست تشوف نايف وهو رايح

قلت لها :حرام .. اكيد انتي زعلانه .. بيطلعون خويتك من البيت

قالت لي : فيصل

قلت : هلا .. سمي

قالت : سم اللي يسم بطنك

قلت : افا تدعين علي

حطت يدها على راسها .. وقالت : اصلاً انا ليه اتكلم معك

قلت : واحد ضربك على يدك .. وقال لك كلميني

ماردت علي .. قلت : اقول نجود

مافيه رد .. ساكته .. قلت : هيه نجود اكلمك

لفت وجهها عني ..حطيت يدي على السياره وقلت: تتغلين

ساكته .. قلت : طيب بغني

قالت بسرعه : لا تكفى .. الله يرحم والديك لا تغني ..جالسين من صباح الله خير مانبي نسمع اصوات مرعبه

قلت وانا اضحك : شفتي كيف خليتك تتكلمين

حطت يدها على خصرها .. وكانت بتقول شي .. بس جا نايف .. حامل القطوه

عطاني اياها .. وقال : وععع وصخت ملابسي

قلت له وانا اتمايل : يااي

قال : امش بس .. عشان نوصل نجود الدوام بعد .. راح نايف عشان يركب قدام من الباب الثاني .. وفتحت نجود الباب اللي وراي .. عشان تركب ..قلت لها بصوت هامس .. وانا ااشر عليها وااشر على القطوه : تشبهون لبعض .. القطاوه على اشكالها تقع

طنشتني وركبت ..شكلها مقهوره مني مره .. ركبنا كلنا .. وحركت السياره .. شغلت اغنية حبك بحر .. وكنت بلف وبحرك لها حواجبي .. راح عن بالي ان نايف معنا .. اشوا ماسويت هالحركه .. كان رحت فيها

.
.

حبك بحر ماله حدود

واسمك بقلبي موجود

انتظرك طول العمر

واقضي عمري كله وعود

***

تعال انسى يللي فات

خلني اشوفك بس لحظه

صدقني مقدر انساك حبي لك لممات

.
.

غير الاغنيه نايف وحط اغنية جاني حبيبي وقال : اهداء مني لكم

.
.

جاني حبيبي من بعد غيبة سنين

يقول سامحني برد لمكاني

وانا وربي ماتشافيت للحين

للحين وانا من جروحه اعاني

.
.

شلتها على طول وقلت له : من صباح الله خير تبينا نسمع طقطقه

رجعت شغلت حبك بحر

قالت نجود : ممكن فيصل تشيل الاغاني راسي يوجعني

قال نايف : ايه والله .. لا تحط شي خلاص

قلت : لا والله هذي سيارتي .. احط اللي ابيه

لف نايف على اخته .. وقال : بيذلنا عشان راكبين في سيارته .. اللي تقول عربة حمير .. امشي بس ننزل نروح مشي

من جده هذا ينزل ويروح مشي .. قلت له : اتحداك تنزل

قال :والله لو ما معي اختي كان نزلت .. بس انا اختي بنت عبد العزيز ماتمشي بالشوارع

قلت : يعني انت ولد شوارع .. عادي عندك تمشي فيها بأي وقت

قال وهو يأشر قدام : فيصلوه .. اقول ناظر قدامك وبلا استهبال

ناظرت في المرايا .. كانت مغطيه وجهها .. وتناظر بالدريشه .. خساره


...............

________
المدرسه .. الساعه : 9:00 صباحاً
____________


** الريم **


من بداية الدوام للحين .. وانا ورهف مانسولف الا عن ملكتي .. ملكتي ليلة بكرا .. ماباركتولي ؟

كانت تقول لي رهف : حطي لك الورد الازرق .. اللي اخذناه في شعرك .. صدقيني حلو .. انا في ملكتي حطيت لي ورده ورديه .. بنفس لون فستاني .. الكل قال لي مره حلوه

قلت لها : امممم مدري بشوف

قالت : مافيه بشوف .. تحطيه يعني تحطيه .. غصب

ضحكت وقلت لها : طيب من عيوني

قالت : تسلم عيونك يامرة اخوي

قلت : طيب بسألك ..انتي الحين بتلبسين الفستان الاحمر .. او البدله البنيه

قالت : مدري انتي وش رايك

قلت لها وانا افكر : اتوقع الفستان الاحمر احلى

قالت : الفستان الاحمر حلو .. بس البدله البنيه افخم

حطيت راسي على الطاوله .. وقلت : والله مدري .. بس ما اوصيك .. لاتفشليني قدام محمد .. ترى والله استحي

ابتسمت بمكر وقالت : نشوف

شلت راسي .. ورفعت يدي انادي هند .. جاتني هند .. وقلت لها : باركيلي ليلة بكرا ملكتي

قالت بأنفعال : احلفي ما اصدق .. غرتي مني انا ورهوفه ههههههههههه .. بس مبروك تستاهلين حبيبة قلبي

قلت : الله يبارك فيك .. تعالي طيب

قالت .. وهي تناظر في رهف : ايه انتي بجيلك في كل المناسبات .. بس رهفوه الدبه ماراح اجيها

قالت رهف : افا ليه

قالت هند وهي تتخصر : لانك ماجيتي ملكتي

قالت رهف : اهم شي اجي عرسك

قالت هند : ان ماجيتي بذبحك

ناظرتني رهف .. وقالت : على طاري نجي ومانجي .. ريوم لاتجين بكرا المدرسه

قلت : لا تخافين ماراح اجي

قالت رهف : وانا بعد ماراح اجي

قالت هند : اكيد ملكة صديقتك

قالت رهف : واخوي

قالت : صدق يعني الريم بتصير مرة اخوك .. حلوحلو

ناظرت في رهف وابتسمت


..................

____________
بيت العمه .. الساعه :1:30 مساءً
____________

** حنان **

كنت جالسه على النت .. من اول مارجعت من بيت خالي .. وانا 24 ساعه على النت ..ماعندي لا شغله ولا مشغله .. الهنوف تروح المدرسه .. وفيصل يروح الدوام .. وانا اجلس بالبيت ..كنت داخله الشات بنك !ملح الحياة ! وكل اللي بالشات يعرفوني .. يعني معروفه فيه اول مادخلت قلت


÷÷÷÷÷÷÷÷÷÷÷÷÷÷÷÷÷÷÷


!ملح الحياة!:وخروا وخروا ملح الحياة جات

*مدلع البنات* : هلا وغلا ملح الحياة منوره الشات

سارووونه : ولكمو حبيبتي ملووحه منوره الشات

!ملح الحياة!:يسلمو سارونه منور بوجودك

!ملح الحياة!: ومدلع ماراح ارد عليه امس يهاوشني هو والمشتاق

^بنت نجد ^: ولكموووووو ملوحه منوره يا الغاليه

!ملح الحياة!: يسلمووو بنورك ياقلبي

& الساهر & : سارونه مارديتي علي ممكن نتعرف اولا

!ملح الحياة!: الساهر وخر عن سارونه انت قال نتعرف قال

سارووونه : ايه والله ملوحه شوفيه من الصبح ناشب لي

(امير المحبين ):السلام عليكم ورحمة الله وبركاته

!ملح الحياة!: وعليكم السلام ورحمة الله وبركاته

*مدلع البنات*: ملوحه افا ليه ماتردين علي ترا المشتاق هو اللي قال خلينا نهاوشها

^بنت نجد ^:وعليكم السلام ورحمة الله وبركاته ولكمووووو اميرووه منور غريبه توك داخل العاده تدخل بدري

!ملح الحياة!: ايه مدلع بيحطها على المشتاق الحين

&الساهر&: مالك شغل ملح الحياة انا كلمت سارونه

!ملح الحياة!: الساهر الا لي شغل ومليون شغل صح سارونه

سارووونه : صحين

(اميرالمحبين): يسلموووووو فديتكم

(اميرالمحبين): بنت نجد مادخلت بدري اليوم كان عندي شغل

!ملح الحياة!: <<< تقول غريبه امير عنده شغل

*مدلع البنات*: قسم بالله ملوحه

(امير المحبين) : ياحب ملح الحياة للشماته

+المشتاق+: باااااااااك << ابوه بلشه الا غصب يصلح السياره

& الساهر & : ولكمووووو المشتاق


÷÷÷÷÷÷÷÷÷÷÷÷÷÷÷÷÷÷


جلست اسولف بالشات شوي .. الا ويجيني المشتاق برايفت

+المشتاق+ : امس ترا مدلع البنات هو اللي بدا يهاوشك

!ملح الحياة!: هو يقول انت وانت تقول هو والله انكم يا الشباب نصابين

+المشتاق+: اكفش هههههههههههههههههههه

ّ!ملح الحياة!:ايه اضحك وش عليك

+المشتاق+ : عادي هذا شات والمزوح تجي وتروح

ّ!ملح الحياة!: ايه عادي انا موشايله على خاطري من احد

+المشتاق+: اعرفك انا ذووووووق

!ملح الحياة!: اوكي يا المشتاق الحين انا طالعه

+المشتاق+ : وين بتروحين ؟ بدري وتو الناس ياشمعة الجلاس

ّ!ملح الحياة!: بروح لايميلي من زمان ماسولفت فيه

+المشتاق+: بس انا ابي اسولف معك

!ملح الحياة!: طيب تعال ماسنجر

+المشتاق+: اوكي هذا ايميلي .....


÷÷÷÷÷÷÷÷÷÷÷÷÷÷÷÷

اظفته في ايميلي .. يسألني عن اسمي .. بقول له وعد .. مثل ماقلت لباقي اللي بالشات

ْْ~.؛~ الحياة ماتسوي شي بدوني ~.؛~ : اسمي وعد وانت ؟
ّّ
ّّّّ{1+4=8 وجهة نظر } : عاشت الاسامي انا اسمي احمد

ّّّّ{1+4=8 وجهة نظر } :تعالي انتي تعرفين احد في الشات من الشباب يعني معك رقمه ؟

ْْ~.؛~ الحياة ماتسوي شي بدوني ~.؛~ :لا طبعاً

ّّّّ{1+4=8 وجهة نظر } :نصابه مدلع البنات قال انك تكلمينه وامير المحبين بعد

ْْ~.؛~ الحياة ماتسوي شي بدوني ~.؛~ :مدلع كان معه رقمي ويكلمني بس انا تركته خلاص وامير المحبين قليل اذا كلمته

ّّّّ{1+4=8 وجهة نظر } :ايه قولي كذا من البدايه مو تقولين لا طبعاً


÷÷÷÷÷÷÷÷÷÷÷÷÷÷÷÷


جلست اسولف معه لليل .. وبعدين جاتني امي .. اضطريت اقول له اني بطلع .. وقفلت

قالت لي امي : امس جا خطبك واحد

قلت لها وانا اقوم من الكرسي : من هذا

قالت : واحد حافي منتف

قلت : مايستحي يجي يخطبني .. مايدري من هم بيت خالي

قالت : الظاهر جريء هذا .. المهم وش سويتي في موضوع نايف

جلست على السرير وقلت : اووف خطتنا حقة القطوه .. اللي قلت لك عنها يمه

قالت : ايه اذكرها

قلت : فشلة فشل موطبيعي .. واللي خربها هو نايف

قالت وهي متفاجأه : ما اصدق .. وانتي وش عرفك

قلت : رغد كلمتني وقالت لي .. بموت قهر .. اكيد الغبيه رهف شمتانه فينا

قالت : وش عرفها انك مع رغد ترا كل شي طاح على راس رغدوه

قلت بعصبيه : اكيد بتشك فيني .. بس قلعتها شكت او ماشكت

جات امي وجلست بجنبي وقالت : ماعليك يابنتي خيرها بغيرها ..وهذا وجهي ان ما اخذتي نايف ولد خالك

............................


____________
بيت مشعل .. الساعه 1:00 صباحاً
____________

** نايف **

جالس بسريري اتقلب .. ماجاني نوم .. مدري ليه .. طلعت من غرفتي ومعي دفتر اشعاري .. ونزلت تحت الحديقه .. الجو كان بارد .. قرب يجي الشتا .. متى يجي بس .. ملينا من هالصيف وهالحر ..جلست واخذت القلم وفتحت الدفتر.. كنت بكتب شعر .. بس لمحت شخص جالس من بعيد ..ليكون نجود ؟.. قربت اكثر .. شفتها لابسه حجاب يعني رهف مو نجود .. قلت برجع على ورا .. لاتشوفني .. ولاني كنت ارجع بسرعه شوي .. ماحسيت الا وانا طايح على ظهري

سمعت صوتها تقول : بسم الله .. من هنا ؟

ماقمت من مكاني قلت اكيد مابتحس لي .. ليل وظلمه

واللي توقعته صح .. ماشافتني .. اخذت نفسها ودخلت داخل .. وش تسوي رهف في الحديقه بهالوقت


.............


** رهف **

وش يسوي نايف في الحديقه وبهالوقت .. لا ومنسدح على ظهره وشكله يفكر بشي .. الحمد الله انه ماشافني ..وش اسوي ماجاني نوم .. دخلت المطبخ .. اخذت كاس .. صبيت لي مويه .. وشربتها .. جلست شوي بالمطبخ .. بعدين اخذت نفسي و ركبت فوق .. دخلت الغرفه .. وقفلت الباب بهدوء

صحى مشعل .. قال لي بصوت كله نوم : الساعه كم

قلت له : الساعه 1

قال : وش مصحيك

قلت : مو جايني نوم

قال : ليه طيب

قلت : مدري

جلس وقال لي بأبتسامه : قومي نطلع نتمشى بالسياره

قلت له : يللا

فتحت الدولاب وطلعت جاكيت : حطيته على السرير

قال لي : ليه صيف

قلت : ترا الجو بارد انت بعد البس لك شي

..............

____________
بيت الريم .. الساعه 9:30 مساءً
____________


** محمد **


حنا الحين في بيت الريم .. واخيراً مروا هالثلاث ايام .. ملكت وخلصت .. والحين الكل يبارك لي

باستني امي وقالت : مبرووك ياولدي

قالت لي رهف : مبروووك محمد

قلت لهم : الله يبارك فيكم

جا اخوها فارس .. واشر على المجلس .. قال : يللا ادخل .. حدك خمس دقايق

قلت : خمس دقايق مايمديني اقول السلام عليكم

قال : راح من الخمس دقايق دقيقتين .. تراني احسب

قلت : لا لاتحسب من الحين .. حرام عليك

قال : طيب ادخل

دخلني وقفل الباب ..شفتها جالسه على الكنبه .. بس ماتناظر فيني

قربت وقلت : السلام عليكم

قالت : وعليكم السلام

قلت لها : كيف حالك الريم

هزت راسها .. جلست بجنبها .. قسم بالله ودي اقوم ارقص من الوناسه

قلت لها : مو مصدق .. احس نفسي في حلم .. اصفعيني عشان اصدق ان اللي يصير حقيقه

ابتسمت بس .. جلست ادقق في ملامحها .. تذكرت الموقف اللي صار في بيتنا ..يوم تلعب هي واختي بالمويه .. كانت حلوه .. بس الحين هي احلى

قلت : اوعدك اني اسعدك .. وان شاء الله ماتمر لحظه في حياتنا فيها حزن .. الدرب اللي بمشيه انا وانتي كله سعاده وفرح

قالت وهي تعدل شعرها : ان شاء الله

قلت لها : عندك جوال .. عشان باخذ رقمك

رفعت راسها وناظرت فيني .. وش فيها تناظرني كذا .. كاني قلت شي غلط .. عادي هي زوجتي ولازم اخذ رقمها .. عضيت على شفايفي بسرعه .. تذكرت ان رقمها عندي وهي تدري .. راح عن بالي .. وش هالفشله بتقول عني استهبل من اولها

قلت لها : الورده اللي بشعرك بتطيح .. لحظه بعدلها

قمت عدلتها وانا مستانس .. ورجعت جلست .. دخل اخوها فارس وقال : خلصت الخمس دقايق .. يللا

ما ابي ما ابي .. ماراح اطلع .. ابي اجلس بعد

وقفت .. بست راسها .. وقلت : يللا عن اذنك يا الغاليه ..واي شي تحتاجينه انا حاظر

قال فارس : لاتجلس تزيد كلام عشان تطول المده

اووف هذا فارس انا حقدت عليه .. ناشب لي في البلعوم

^*^
/
\
/
\
/
\
/
\
/
^*^

**** نهاية الجزء الثالث عشر ****




الريم تنتظرها مع محمد ايام حلوه ( اكيد توها مالكله )

ورهف ايامها الجايه بتكون زينه او شينه ؟ .. تابعوني في البارت الرابع عشر وتعرفون

كل حبي

...:::][ الجزء الرابع عشر ][:::...

____________
بيت الريم ..الساعه 12:00 مساءً
____________

** الريم **

^*^
/
\
/
\
/
\
/
\
/
^*^


ابيك تعرف!

ان لا يمكن إحساس قلبي يخليك

لو الشعور بداخل القلب

ماات ..

العمر يمضي!

ونصه يناديك

والنص الاخر يمسح

بدموع الآآآهات ..

مستحيل؛؛

اتخلى عنك واقول

ناسيك

،،انا،،

لاخريوم في عمري

باكون وياك ...!

^*^
/
\
/
\
/
\
/
\
/
^*^

هذا المسج جاني الحين من محمد
كتبت له مسج

^*^
/
\
/
\
/
\
/
\
/
^*^

مشتاق...

صدقني مشتاق لشوفك ولقياك

وكل العيون بلا عيونك

ممله ...

اسمك على لساني

وشوقي لملقاك

ورسمك ترى بوسط

قلبي محله ...

كلي امل تجمعني الايام

وياك

ياملك القلب والعقل

كله...

^*^
/
\
/
\
/
\
/
\
/
^*^

اول مارسلت المسج .. على طول محمد دق علي

&مستحيل انساك& يتصل بك

~~)(~~ دنياك دنياي هو حد يسواك في القلب وياي وفي البال وياي
يا الغالي وشلون تضن ابنساك كيف الهوا يهون والقلب يهواي~~)(~~

اغنية راشد الماجد .. كانت نغمة جوالي

رديت .. قال لي : الووو.. هلا وغلا الريم

قلت : هلا فيك

قال : كيف حالك يا الغاليه

قلت : بخير الحمد الله

قال: ان شاء الله دوم مو يوم

قلت : يدوم غاليك ومغليك .. وانت كيف حالك

قال : بخير دام انا اسمع هالصوت

استحيت ومارديت عليه .. قال : ليه مانمتي

قلت : الحين بنام

قال: اجل اخليك تنامين .. تصبحين على خير

قلت : وانت من اهله

قفلت .. ورحت انسدحت على سريري وانا مبسوطه اني اكلم محمد

&مستحيل انساك& يتصل بك

~~)(~~ دنياك دنياي هو حد يسواك في القلب وياي وفي البال وياي
يا الغالي وشلون تضن ابنساك كيف الهوا يهون والقلب يهواي~~)(~~

رديت : الوو

قال : هلا الريم .. نسيت اقولك اني بكره الظهر بمرك .. عشان نطلع نتغدا سوا

قلت : اممممم

قال وهو يضحك : اممممم وشو ؟

قلت : ان شاء الله

قال : انتبهي لنفسك الريم

قلت : طيب .. وانت بعد

قال : من عيوني .. يللا مع السلامه

قلت : يحفظك الرحمن

ناظرت في الساعه .. شفتها 1ونص .. خل انام احسن .. اخاف يجي الصبح وانا مانمت .. بعدين يمرني محمد الظهر وانا نايمه .. طفيت النور وتغطيت .. ونمت

....................

_____________
بيت مشعل ..الساعه :1:30 الظهر
_____________


** رهف **


اليوم الخميس .. كل اهل مشعل في بيتنا ..عشان بيتغدون معانا .. كنت جالسه اسولف مع الهنوف

قالت لي : انا مو مره شاطره في الرياضيات .. والامتحانات قربت .. عشان كذا خايفه

قلت لها : انتي سنه ثالثه صح

قالت : ايه

قلت : خلاص اجل .. في الامتحانات تعالي لي كل يوم .. نذاكر سوا

قالت وهي مبسوطه : والله جد .. تسلمين حبيبتي

قلت : الله يسلمك .. انا شاطره في كل المواد .. عدا الانجليزي اتوهق فيه

جات حنان .. وقالت : تعالي هنوفه .. ابيك شوي

قالت الهنوف : لحظه رهف .. شوي واجيك

قلت وانا ابتسم : مو مشكله خذي راحتك

راحت الهنوف مع حنان .. وصرت جالسه لحالي

بدق على الريم باخذ اخبارها الجديده

دقيت عليها

ردت : الوو هلا رهوف

قلت : هلا ريوم .. وينك

قالت : اتغدا مع محمد

قلت : بل عليكم من ثاني يوم طلعات .. وش بتسوون بعدين

ضحكت وقالت : حسدتنا هالدبه

قلت : شوف هذي مايمدي الواحد يمزح معها .. قالت حسدوني .. ويغارون مني .. عطيني محمد بس

قالت بضحكه : لحظه

اخذ السماعه محمد وقال : هاه رهوف .. وش تبين .. مو فاظيين لك حنا

قلت : مالت على اللي يدق عليكم يبي ياخذ اخباركم

قال : طيب طيب وش تبين .. بقفل انا

قلت : ما ابي شي .. يللا باي

قال : باي

قلت بسرعه : لحظه لحظه

قال وشكله عصب : يووه وش تبين بعد

قلت : خلاص خلاص .. يللا باي هههههههههه

قفلت .. و حطيت الجوال بجنبي

..................................



** نجود **

كنت نازله مع الدرج .. بروح اجلس مع بنات عمتي

وانا نازله سمعت وليد اخو شجن يناديني

قلت : هلا لودي .. وش بغيت ؟

قال : فيه بنت تبيك برا تقول انها صديقتك

عقدت حواجبي وقلت : وش اسمها

قال : اسمها جوري

جوري .. مااذكر اني اعرف بنت بهذا الاسم .. يمكن وحده من الشغل اكيد في شي مهم .. لان وحده ما اعرفها زين .. تجيني بهالوقت وبدون ماتعطيني خبر حتى

ناظرت في وليد شفته للحين واقف .. ابتسمت له وقلت : خلاص الحين بطلع

راح وليد المجلس .. وانا رحت عند باب الصاله .. كنت بطلع .. بس تذكرت ان اهلنا هنا .. ويمكن .. زوج عمتي .. او سلطان او أي احد اشوفه برا .. بخلي الخدامه تناديها .. اممممم لالا انا بطلع وبشوف وش السالفه

رجعت غرفتي .. واخذت العبايه والشيله .. لبستهم ونزلت اركض

فتحت باب الصاله وطلعت .. وقفت شوي اناظر يمين وشمال .. مافيه احد

لمحت فيصل .. يناظر فوق وساند ظهره على سيارته

بسأله يمكن شافها ..

رحت لعنده وانا اغطي وجهي بيدي .. من الشمس

قلت : السلام عليكم

عدل وقفته وقال : وعليكم السلام

قلت بدون ما اناظر في وجهه : كانت فيه بنت واقفه عند الباب .. شفتها

قال : هاه ؟

قلت : اقولك فيه بنت واقفه عند الباب شفتها

قال : وش تقولين انتي ؟

عضيت على شفايفي وقلت : ولا شي

قال : زين وشوله جايه تكلميني

قلت : انا مو جايه اكلمك

رفع حاجب وقال : اجل ليه طالعه برا ؟

رفعت راسي كاني افكر بعمق وقلت : طالعه اسقي الزرع

قال : اجل بنغير اسمك من نجود الى راجو هههههههههههههههههههههههه

لويت فمي وقلت : هاهاها بايخ

تغيرت ملامحه الى الجد بعد ماكان يضحك .. وقال : جد نجود انا بايخ ؟

اففففف الحين بيطلع لي بسالفه جديده

لفيت عنه وكنت بمشي .. يوم سمعته يقول اسمي

وقفت وقلت بنرفزه : نعم

قال : انا

لفيت عليه وقلت : انت وشو

حك راسه وقال : انا .. انا ..أأنا

حركت راسي يعني وش تقصد

ابتسم ابتسامه عريضه وقال : انا جوري

حطيت يدي على خصري وقلت : لا والله

حط يده على خصره مثلي وقال : ايه والله

قلت بصوت عالي شوي : فيصلوه .. وش تبي

قال : اصغر عيالك فيصلوه

قلت : استاذ فيصل وش تبي

قال : اريد ان احادثك قليلاً

حطيت يدي على فمي امنع ضحكتي

قال : هي انتي .. ترا انا كنت اخذ الاول في اللغه العربيه

قلت بمزح : يعني انت رحت المدرسه ؟

قال : لا بس اسمع فيها .. المهم طسي داخل لا يجي اخوك نايف ويسويلك سالفه .. صدق بنات هالزمن مايستحون

لفيت راسي اناظر ورا .. قلت يمكن الشغاله واقفه وراي .. رجعت اناظره وقلت: انا اللي ما استحي ؟

رفع ايدينه فوق وكانه يستسلم وقال : لالا مو انتي اللي ماتستحين انا اللي ما استحي .. ايه لا تاكليني بعد

هزيت راسي ومشيت .. ما ابي اطول الوقفه معه .. اصلاً هذا وش يبي .. من يشوفني يقهرني .. لكن اوريه

ضربت الارض برجلي من القهر .. لفيت وراي لقيته ميت ضحك .. وهذا اللي قهرني اكثر .. دخلت داخل بسرعه

ماكان فيه احد بالصاله .. فصخت العبايه .. وعطيتها الخدامه

دخلت المجلس سلمت عليهم .. ورحت جلست بجنب رهف لانها جالسه لحالها

قلت لها : وين هنوفه وحنونه

قالت : هنوفه كانت معي .. نادت عليها حنان ومدري وين راحت

ابتسمت لها وقلت : ماقلتي لي اخبار الريم صديقتك

................................


** حنان **


كنت اكلم الغبيه هنوفوه : مو قلت لك الف مره .. لا تتكلمين معاها .. هذي نسره ماتدرين هي صديقه او عدوه

قالت : حنان خلاص عاد .. لحد يسمعك

قلت : ايه ماعندك الا هالكلام ..يللا روحي اجلسي مع نجود وشجن

قالت : وانتي وين بتروحين

تخصرت وقلت : مالك شغل

راحت .. ورحت انا غرفة رغد .. دخلت .. وجلست

قالت لي : اخيراً جيتي

قلت : وش اسوي .. ما ابيهم يحسون انك رحتي .. وانا رحت وراك

قالت : والحين وش نسوي

قلت لها : لازم يصير عندنا جوال رهف

انسدحت رغد على السرير .. وقالت : انا اخاف .. ما ابي يصير لي مثل المره اللي راحت .. ويطقني عمي نايف قدام الاعداء

قلت : لا هالمره محد راح يدري .. وبعدين الكل نسى سالفتك

رفعت راسها .. وقالت : ايه هين ..عمي نايف شافني امس وماعطاني وجه

بزره هذي .. وش اسوي فيها .. قلت : طيب حبيبتي .. جوال رهف وينه

قالت : تلقينه عندها .. هو على طول بيدها

قلت : روحي الغرفه شوفيه

قامت وطلعت من الغرفه .. تأخرت شوي

بعدين جات وقالت : مو في الغرفه

قلت : اووف اجل قومي ننزل تحت

.
.
.

نزلنا.. وجلسنا مع باقي البنات ..شوي وقالت ام مشعل : يللا بقوم بجهز الغدا

قامت رهف عشان بتساعدها .. ايه طبعاً تسوي حالها قدام الكل ..البنت المطيعه والخدومه .. شفت الجوال مرمي على الارض مكان ما كانت جالسه .. قربت رغد مني

وقلت : روحي جيبيه

قالت : ما ابي اخاف

قلت : روحي اجلسي عليه .. ولا جيتي بتقومي .. خذيه معك

قلت : اخاف والله

دفيتها بيدي وقلت : روحي

قامت بخوف .. وجلست عليه .. شوي و قامت وطلعت برا المجلس .. ايه زين اخذته معاها .. قمت انا عشان بطلع

قالت لي نجود : وش فيك حنونه قايمه قاعده

قلت : لا بس بروح الحمام (( الله يكرمكم ))

طلعت .. شفت خالتي ام مشعل ..بالصاله .. مدري وش تسوي

دخلت الحمام .. وفتحت الباب شوي .. انتظرتها تروح .. وبعدين طلعت .. ركبت غرفة رغد اركض

فتحت الباب .. شفت رغد جالسه على السرير .. وبيدها الجوال

قلت لها : كفك اخذناه

قالت وهي تضحك : بس وش فايدته

مابجلس افهم فيها .. لانها ماراح تفهم .. جلست ادور في الاسماء .. قلت يمكن رهف ماخذه رقمي .. تبي تخرب سمعتي ولا شي .. مالقيته .. ايه اشوا .. لانها تسويها احسها حاقده علي .. وودها تنتقم مني بأي طريقه .. مع اني ماسويت لها شي .. والله بتغدا فيك يارهف قبل ماتتعشين فيني

ارسلت لنفسي مسجات من جوالها .. وارسلت لها انا مسجات .. ودقيت على نفسي من جوالها

وحفظت رقمي في جوالها .. بـ عبد الرحمن

وحفظت رقم مشعل في جوالي

قلت خلاص .. رغد رجعي الجوال .. بس هاه .. لحد يشوفك


÷÷÷÷÷÷÷÷

المهم مشى كل شي في بيت خالي .. مثل ماخططت له .. ولا رهف ولا غيرها حس باللي يصير ..

رجعت من بيت خالي وانا مبسوطه مره .. اكيد يحق لي .. دخلت النت .. فتحت ايميلي .. شفت المشتاق .. رحت سلمت عليه وكلمته .. بعدين قلت له


~.؛~ الحياة ماتسوي شي بدوني ~.؛~ : احمد ممكن اطلب منك طلب ؟
ّّ
ّّّّ{1+4=8 وجهة نظر } : امري وتدللي

ْْ~.؛~ الحياة ماتسوي شي بدوني ~.؛~ :ما يامر عليك عدو .. بعطيك رقم جوال واسم وحده ..دق عليه وقول للي يرفع هالوحده تكلم واحد اسمه عبد الرحمن .. ممكن ؟

ّّّّ{1+4=8 وجهة نظر } :يعني اني اخرب سمعة البنت .. لاطبعاً مستحيل ما اسويها لو وش مايصير .. لا تربيتي ولا اخلاقي تسمح لي اسوي هالشي

وهذا بيسوي حاله الحين ابو الاخلاق .. ومترح مره .. قال وش قال ما اسويها مستحيل ..انت ماتسويها مليون غيرك يسويها

ْْ~.؛~ الحياة ماتسوي شي بدوني ~.؛~ : خلاص اجل .. اعتبر اني ماقلت الكلام اللي تو

ّّّّ{1+4=8 وجهة نظر } : مو مشكله .. وينك اليوم مادخلتي بدري ؟

وكملنا سوالفنا بالمسن انا واحمد عادي


.............................

____________
بيت الريم ..الساعه00 مساءً
____________


** محمد **

صار لي ساعه .. جالس بالمجلس .. انتظر الريم تخلص .. عشان نتطلع سوا.. واختها ساره وجعت لي راسي .. ماتسكت هذي .. اعضم من اخوي سعد .. الله يعين الريم عليها

هزتني .. وقالت : خلك معي .. ناظر فيني .. اخذت لي امي فستان .. عشان الملكه بس طلع ضيق
رجعناه .. واخذنا واحد ثاني .. بس مو حلو .. عطيته بنت خالتي .. وخليت الريم
تشتريلي فستان ثانيئ .. شرت لي فستان قصير لونه احمر .. حلو ..بعدين
سالت رهف اذا فستاني حلو اولا .. قالت حلو .. سالت امي اذا حلو اولا .. قالت حلو .. سالت ابوي .. قال حلو
سالت اخوي فارس .. قال حلو .. سالت اخوي خالد قال حلو .. الفستان هذا بخليه .. عشان البسه في المدرسه السنه الجايه .. واوريه مدرستنا.. تخيل لوكان الفستان ابيض
ماراح يكون حلو .. لان الفستان اللي بلبسه في العرس ابيض .. عشان اصير مثل العروس ..امممم لو وردي مثلاً او ازرق


ياربي .. بموت مخي بينفجر .. هذي ماتسكت ولا ثانيه .. قلت لها : الريم بتتاخر


قالت : الريم تتاخر .. تدري ليه .. لانها تتروش .. بعدين تمشط شعرها وتحط لها كريم ينعم الشعر مره حلو .. وريحته حلوه ..يشبه ريحة الورد .. خالتي شرته لنا .. حتى انا حاطه لي الحين منه .. قرب شم شعري .. المهم بعدين تحط لها
كريم في وجهها .. بعدين تحط كحله .. وبعدين تحط شي ما اعرف اسمه
لحظه لحظه بتذكر امممممم


فاضي لك تتذكرين وماتتذكرين .. قلت لها : انا ابي الريم .. الله يخليك روحي شوفيها .. عشان بنطلع نتعشا سوا


عدلت جلستها وقالت : الله بتروحون تتعشون .. مره رحنا تعشينا مع بيت عمي .. المطعم كان مره يجنن .. بس الريم ماعجبها .. مدري ليه .. بس امي عجبها .. كان يشبه البيوت القديمه ..
انا اكلت بيتزا .. انت تحب البيتزا ؟


وش تقول ذي .. وش تخربط علي .. عقدت حواجبي وقلت : خلاص ..ابوس يدك اسكتي


ناظرت في يدها وقالت : تخيل امس طاحت على يدي السكين .. وانجرحت .. قلت لامي .. وامي قالت لابوي .. وابوي وداني المستشفى .. خيطولي الجرح .. كان يعورني مره الحين يعورني بس مو مره


فتحت الريم الباب .. وقالت : تأخرت


واخيراً .. الله جابك .. خذي اختك وارميها برا بس .. قلت : لا عادي ماتأخرتي .. يللا نمشي

ناظرت الريم في ساره وقالت : سارونه حبيبتي مالبستي .. يللا روحي البسي

قلت مستغرب : وليه تلبس

ابتسمت وقالت : عشان باخذها معنا

قالت ساره : البس بدلتي ذيك البنيه .. اللي فيها شوي بيج مع عنابي ..وعند الخصر فيها ربطه .. اللي لبستها في ملكة صديقتك هند .. والكل قال حلوه .. حتى اخوي فارس هو اللي اختارها لي .. مره ذوقه يجنن .. او البس فستاني الاصفر .. اللي اخذناه من جده يوم نروح ذيك السنه


لا مستـــــحــــــيل اخذ هذي معي


_______________
بيت مشعل .. الساعه 30 مساءً
_______________



** مشعل **


كنت جالس بالصاله .. مع امي .. نشوف برنامج اليوم السابع على MBC1

~~)(~~مشتاق انا مشتاق تلعب بي الاشواق
ماتدري كيف الشواق في غيبتك حراق~~)(~~

اخذت جوالي .. وناظرت الرقم .. غريب

رديت قلت : الوو نعم

قال: الاخ مشعل

قلت : ايه مشعل معك .. من انت

قال : حبيت ابلغك .. ان زوجتك رهف .. تكلم واحد اسمه عبد الرحمن

قفلت الجوال بوجهه .. صدق مايستحي .. من وين طالع لي ذا بعد

رجع يدق .. ويدق .. ويدق

قالت امي : مشعل عاد شوف جوالك .. ازعجنا

اخذت الجوال .. ورحت عند باب الصاله .. ورديت

قلت بصوت عالي : خير انت .. وش تبي

قال : الحين انا اسوي فيك خير .. تجلس تصارخ علي

قلت : اي خير الله يلعن شكلك .. ماعندكم سالفه انتم .. وش تستفيد اذا خربت بيت الناس

قال : على العموم انا حذرتك .. زوجتك لعابه .. مافيه واحد ماكلمته .. واذا ماكنت مصدق روح شيك على جوالها

قفلت في وجهه مره ثانيه ..وركبت فوق .. دخلت الغرفه .. ماشفت رهف ..بس سمعت صوت المويه بالحمام (( الله يكرمكم )) .. اكيد تتروش .. انسدحت على السرير .. سمعت صوت نغمة المسج حق جوال رهف ..طنشته .. وغمضت عيوني .. سمعت النغمه مره ثانيه .. قمت واخذت الجوال .. فتحت المسج


^*^
/
\
/
\
/
\
/
\
/
^*^

__ عبد الرحمن __

رهف حبيبتي

اذا نام زوجك مشعل دقي علي

انتظرك اوكي

^*^
/
\
/
\
/
\
/
\
/
^*^

فتحت المسج الثاني

__ عبد الرحمن __

طولتي قلبي وانا ابي اطلع

خلاص اكلمك بكرا عند المدرسه

مثل كل يوم

^*^
/
\
/
\
/
\
/
\
/
^*^

بسرعه رحت للرسائل المرسله

وفتحت مسج من المسجات

^*^
/
\
/
\
/
\
/
\
/
^*^

هلا حبيبي عبد الرحمن

انا بخير بس هالمشعل نشبه مو راضي ينام

وما ابيه يشوفني اكلم بهالوقت ويشك

^*^
/
\
/
\
/
\
/
\
/
^*^
فتحت مسج ثاني هي كاتبته

^*^
/
\
/
\
/
\
/
\
/
^*^

مشكور عبد الرحمن على الهدايا اللي تجيبها لي
احسن من ها المشعل مايجيب لي شي

وبكرا طلعتي من المدرسه بعطيك هديه
شريتها لك

احبك


^*^


رميت الجوال على باب الحمام .. وتكسر.. رحت دست عليه .. ودقيت الباب بقوه

قالت رهف : مشعل وشو .. الحين بطلع

قلت : اطلعي الحين ابيك

كنت واقف عند الباب .. معصب مره ..انتظر هالخاينه تطلع من الحمام

ضربت الباب بقوه

طلعت وقالت : وش فيك مشـــ...

ماخليتها تكمل كلامها ..مسكت شعرها .. شديته وقلت لها : من عبد الرحمن

قالت : مشعل اترك شعري

شديته اكثر وقلت : أسألك انا ردي

قالت بصوت عالي : اي عبد الرحمن

عطيتها كف وقلت : لا تصارخين علي .. انا اللي المفروض اصارخ عليك

رميتها على السرير .. وقلت : بتتكلمين ولا اذبحك

حطت يدها على وجهها .. وجلست تبكي

رحت لعندها وبعدت يدها .. وقلت : لا تجلسين تبكين لي .. وتمثلين دور المسكينه المظلومه

قالت .. وهي تبكي : ما اعرف عن وشو تتكلم

قلت وانا ااشر على عيوني :اصدقك واكذب عيوني

ساكته .. ماقالت شي .. لان خلاص كل شي مكشوف

قلت لها : طلعي الهدايا

قالت : أي هدايا

جالسه تستهبل علي .. ماتدري اني عرفت كل شي .. لكن انا اوريك يارهف .. صرخت عليها وقلت : الحين جوال مافيه .. والمدرسه انسيها خلاص .. وياويلك لو اشوفك ماسكه التلفون
والا اقولك .....

فتحت الدرج .. وطلعت مقص

^*^
/
\
/
\
/
\
/
\
/
^*^

***
**** نهاية الجزء الرابع عشر ****

...:::][ الجزء الخامس عشر ][:::...

____________
بيت مشعل .. الساعه30 مساءً
____________


** رهف **

طلع من الدرج مقص .. وراح قص سلك التلفون .. ورمى المقص على السرير .. وطلع من الغرفه وقفل الباب

اول ماطلع مشعل من الغرفه .. مسحت دموعي و رحت احاول افتح الباب .. ومقفل الباب بالمفتاح بعد .. يحسبني هالمجنون بسكت له ..يطقني واسكت .. بقول لابوي واخوي محمد .. قسم بالله ماراح اسكت .. بيشوف.. ماابي اجلس هنا ولا دقيقه .. هالبيت ما احبه .. اتمنى لوانا مادخلته

بعدت عن الباب .. ورحت جلست على السرير .. قمت من السرير .. ورحت عند الدريشه .. بعدت الستاره .. وفتحتها .. شفت نجود تركض ورا رغد في الحديقه .. راقبتهم شوي ..بعدين قفلت الدريشه .. اووف ماعندي شي اسويه .. ابي اطلع بروح بيت اهلي ..رحت عند الباب .. وجلست اطقه بقوه ..عشر دقايق وانا اطق .. يدي عورتني ..ومحد جا ..ورجعت اطق بقوه اكثر .. فتح مشعل الباب .. ودخل

عطاني نظره .. وقال : انهبلتي انتي انهبلتي .. غصب تبين امي تسمع الصوت وتجي

قلت : ايه انهبلت .. وان جلست في هالبيت بنهبل اكثر

جلس على الكرسي .. وحط رجل على رجل .. وقال : اجل اعطيك معلومه من الحين ..عشان تحسبين حسابك .. انك بتجلسين في هالبيت طول عمرك

رحت اركض عند الباب .. كنت بطلع .. قام من الكرسي .. وكان اسرع مني مسكني .. وقفل الباب

جلست امسح الدموع اللي على وجهي .. وقلت : ماابي اجلس .. غصب .. ابي ارجع بيت اهلي .. وش سويت لك انا

عقد حواجبه وقال : مسكينه .. للحين تمثلين .. اقولك عرفت كل شي ..واصلاً احمدي ربك .. انك تعيشين في هالبيت .. لو غيري طلقك على طول

قلت له : ما ابي اعيش في هالبيت .. طلقني خلاص

ضحك وقال : مجنون اطلقك

كنت بقول له .. ماعندك كرامه تجلس مع وحده ماتبيك .. بس ماقلتها ..خفت يطقني مره ثانيه

قلت : تجلس مع وحده ماتبيك

رجع جلس على الكرسي .. وقال : اجلس معها في حاله وحده

سكت شوي ..وكمل : اذا كنت انا بعد ما ابيها

وهذا اللي توقعته من زمان .. مشعل مايبيني ..قلت : اجل ليـ...

قاطعني وقال : بتقولين ليه متزوجك

قلت : ايه ليه متزوجني دام انك ماتبيني .. وانا لا اعرفك ولا انت تعرفني .. من اللي حذفك علي بس

ناظر فوق .. وجلس يفكر .. قال : خــالـد

غمضت عيوني من قال خالد .. خايفه من اللي بيقوله ..وصلنا لموضوع خالد .. لازم الحين يقول لي عن كل شي .. يريحني ويريح نفسه

رفع حاجب وقال : اشوف الاسم موغريب عليك

مااحب اسلوب مشعل هذا .. هو عارف احق المعرفه .. ان اسم خالد مو غريب علي

قال : انا ماكنت راح اقولك عن شي .. قلت البنت زينه معي ومحترمه .. بس على اللي سويتيه .. تستاهلين اقول لك باللي اخس والعن منه .. اجل انا مشعل ولد عبد العزيز وحده مثلك .. تضحك علي

سكت وجلست اناظر في الارض ..وش ضحكت عليه فيه .. قولولي

مدي يده و رفع راسي بقوه .. وقال : رهف اسمعيني زين .. ام رغد انا حبيتها حب موطبيعي .. حتى من حبي لها اخذتها غصب عن ابوي .. وخالد النذل الحقير .. اخذها مني بكل سهوله

خالد اخذ منه زوجته .. اي عقل اللي يصدق هالكلام ..يعني مثلاً خالد حبها واخذها من مشعل ..انا اللي اعرفه ان ام رغد يوم تموت في الحادث كانت زوجة مشعل .. وخالد كان صغير

كمل كلامه .. وقال : انتي تدرين ان ام رغد .. ماتت في حادث سياره

هزيت راسي بأيه .. قال : وتدرين من اللي كان يسوق السياره .. اللي دعمت ام رغد

كنت بقول له لا .. بس حطيت يدي على فمي .. وقلت بصدمه : خــالــد

لمعت عيونه وقال : ايه خالد .. مستحيل اسامحه .. ووعدت نفسي اني انتقم منه .. وانا الحين خلاص انتقمت منه .. مثل ماهو اخذ مني اعز شي عندي .. انا اخذت منه اعز شي عنده

طاحت دموع من عيوني .. هزيت راسي وقلت : مشعل انت غبي ..وعقليتك ماتتناسب مع عمرك .. لان مافيه احد يفكر بهالطريقه ..الا اللي تفكيره محدود مثلك

صرخ علي وقال : حطي نفسك في مكاني

قلت : فيه شي اسمه قانون

قال : الا مشعل ماعنده هالشي .. ياخذ اللي يبيه بأيده

رجعت شعري ورا اذني وقلت : مشعل لازم تفهم .. خالد ما اخذ منك شي ..استغفر ربك .. الاعمار بيد الله .. وكل شي مكتوب .. وام رغد هذا يومها .. وثاني شي خالد كان صغير

قال بعصبيه : دام انه صغير .. ليه يسوق سياره

قلت له : وش عرفك اني اعزشي عند خالد

اخذ نفس وقال : خالد درس مع صديقي وانا يوم عرفت انه يدرس مع صديقي .. اتفقت معه على انه يخبرني كل شي عنه .. وخالد يحبك من زمان .. وكان على طول يقول انه يحب بنت جيرانهم بنت ابو يوسف ..واذاخلصت ثانويه بيتزوجها ..ماكان صعب علي ابداً اني اطلعك .. واتزوجك لان ابو يوسف ماعنده الا بنت وحده .. ومحد من اهلي قال اني اخذت وحده غريبه مايعرفون عنها شي .. لاني قلت لهم انك صديقة نجود في الدراسه

قلت : مستحيل اجلس معك دقيقه وحده .. مشعل طلقني الله يخليك

قال : ولا يهمك بطلقك

حطيت يدي على قلبي .. وحسيت براحه شوي .. قلت له : متى

قال : اذا خالد تزوج .... والا انتي للحين تحبين خالد ؟

قلت بأنفعال : انت غبي .. ماتفهم .. فتح عقلك .. الحين خالد اكيد نساني ..وانا نسيته من زمان

ابتسم بسخريه .. وقال : لهذي الدرجه انا نسيتك خالد ..؟

حطيت راسي على السرير .. وجلست ابكي :مشعل انا وانت مانقدر نعيش مع بعض خلاص .. انا اكرهك

سمعت صوت احد يطق الباب .. بعدين دخل .. كانت خالتي ام مشعل .. قالت : وش فيها رهف تبكي

قال مشعل : هااه .. مدري يمه صار لي ساعه اسألها .. مو راضيه تقول

نزل لعندي .. مسح على راسي ..وقال : رهوفه تعبانه .. احد ضايقك

كذاب .. حقير يعرف يمثل .. بعدت يده الخايسه عني

قالت خالتي ام مشعل : قولي يابنتي وش فيك .. مايصير تبكين بدون سبب

رفعت راسي وقلت : ابي اجلس لحالي

قالت ام مشعل : اللي يريحك يابنتي .. مشعل يللا خلينا نطلع

قال مشعل : رهف .. اذا احتجتي اي شي .. انا تحت

طلعت خالتي ام مشعل .. وطلع مشعل وراها .. 5 دقايق .. وسمعت صوت الباب يتقفل بالمفتاح


....................................

____________
المطعم.. الساعه:00مساءً
____________


** محمد **


وصلنا المطعم .. نزلت من السياره .. ونزلت الريم ومعاها ساروه

مسكت يد الريم وحنا نمشي

لفت ناظتني .. ابتسمت لها ابتسامه حلوه

حسيت بأحد ماسك يدي الثانيه

لفيت ناظرت في يدي وناظرت في وجه ساره

شفتها تبتسم لي ابتسامه عريضه

اول مادخلنا وجلسنا

قلت : ريمي قلبي وش تبين تاكلين

قالت : مثلك

قالت ساره بدون ماسالها : انا ابي بيتزا .. مره رحنا مع بيت عمي مطعم حلو يشبه البيوت القدميه .. وانا طلبت بيتزا و...

قاطعتها بضحكه بارده : ههه ايه قلتي قبل .. اجل تبين بيتزا

قالت : ايه انا ابي بيتزا ..لاني احبها مره .. بس ما ابيها حاره .. بعدين ما اعرف اكلها .. ولاتجيب لي بيتزا كبيره .. ابي صغيره لاني بسرعه اشبع .. طالعه على الريم .. حنا في البيت ماناكل كثير .. اكثر واحد ياكل اخوي الدب خالد .. اما اخوي فارس مره ضعيف .. انا احب اخوي فارس لانه .....

قالت الريم وهي تضحك وشوي منحرجه: طيب ساره .. يعني خلاص بيتزا

زين سكتتها .. اليوم شكلي بطلع من المطعم للمستشفى على طول .. من وجع الراس

قلت : انا مشتهي اكل شي فيه دجاج امممم بس وش بالضبط مدري .. انتي وش رايك ريمي

قالت ساره : على فكره كبسة الدجاج اللي تسويها امي .. تهبل .. طعمها مدري كيف .. ريوم امي وش تحط فيها ..؟

الحين فيه احد جاب طاري كبسة الدجاج ؟

قالت الريم : ماعليه سارونه حبيبتي .. موهذا موضوعنا .. روحي العبي مع الصغار هناك

هزت راسها .. وقالت : لحظه اول بنشوف محمد وش يبي ياكل

ملقوفه ياناس .. وش سويت في حياتي .. عشان تجيني هالبزره تنكد علي طلعتي مع خطيبتي

قالت لها الريم :يللا سارونه روحي العبي .. واذا جا الطلب .. انا بناديك

قامت من الكرسي .. وراحت تلعب .. ناظرت في الريم .. وقلت لها : عجبك حبيبتي المطعم

قالت : ايه مره حلو

قلت : لان عيونك حلوه تشوف كل شي حلو

استحت .. وقالت : تسلم

قلت : الله يسلم قلبك فديتك

جات ساره تركض ..اخذت نفس وقالت : تخيلوا ..رحت بلعب مع باقي الصغار .. جا ولد دب .. مو دب الا فيل .. دفني وطيحني على الارض .. قسم بالله .. يوم جات امه .. قلت لها ولدك دفني .. الكذاب يقول قدام امه انه مادفني

ضحكت الريم .. وقالت : ياحليلها

الا قولي ياشينها ... صدقوني برتكب في هالبنت جريمه

جلست على الكرسي .. وضربت راسها بيدها .. وقالت : صح نسينا ما نسال محمد عن عمره

قلت لها : 24 سنه

هزت راسها وقالت : عمر مناسب .. وانتي ريوم كم عمرك اكيد عشر

قالت الريم : لا انا 18 سنه

قالت : وشلون تتزوجون وريوم اكبر من محمد بكثير

قلت انا على طول : عادي عادي الحين الكل يتزوج

عدلت ساره شعرها وقالت : اجل ليه للحين انا ماتزوجت

قالت الريم : اذا صرتي بعمري بنزوجك .. خلاص

شفت ريوم تناظر في الساعه .. قلت لها : تبين ترجعين بدري

ابتسمت وقالت : راح نتأخر اليوم اولا؟

قلت لها : لا ماراح نتأخر .. بنطلع من هنا .. وبنروح البيت بنزل شوية اغراض ،، اشرت على ساره من فوق عشان اوضح للريام ان الاغراض هي ساره ،، وبنروح نتمشى سوا

قالت ساره بسرعه : مايحتاج نمر ننزل الاغراض .. خليهم في السياره


............................


_____________
بيت مشعل .. الساعه:00 مساءً
_____________


** رهف **


ابي اطلع .. لازم اطلع من هنا بأي طريقه .. مو قادره اتنفس .. حابسني هنا كأني حيوان .. جلست على الارض .. مسكت سلك التلفون .. قصه ما اقدر الصقه مع بعض .. ايه عندي فكره .. رحت وجلست ادور في الادراج .. اخذت لصقه .. ولصقت سلك التلفون .. رفعت السماعه .. ماكان فيه خط .. حركت السلك شوي وجا الخط .. اقدر اكلم .. الحمد الله .. دقيت رقم بيت اهلي بسرعه .. قبل مايجي مشعل .. يللا احد يرد .. وينهم ..نايمين ولا وشو .. سمعت صوت احد يقول الوو

قلت : الووو الووو مين محمد

قال : لا انا يوسف

قلت : يوسف تعال بسرعه .. طلعني من بيت مشعل .. طقني وحبسني في الغرفه .. الوو يوسف وينك

قال بملل : ليكون تحسبيني فاضي لك .. لاتجلسين تسوين مثل الافلام .. برجع بيت اهلي .. وبروح لامي ..بلا دلع

قلت بصوت مبحوح من كثر البكي : يوسف الله يخليك انا اختك .. تعال طلعني .. او عطني محمد

قال بعصبيه : البنت السنعه هي اللي تجلس في بيت زوجها .. ولا تدقين البيت لان مافيه احد فاهمه .. بنات اخر زمن

قفل السماعه في وجهي .. ضميت سماعة التلفون وجلست ابكي .. شكلي ماراح اطلع من هنا طول عمري



.......................................

** مشعل **


دخلت الغرفه .. شفتها ماسكه السماعه .. رحت سحبتها من عندها بقوه .. قلت لها : كلمتي مين

قالت بخوف : ماكلمت احد

قلت : كذابه .. بسرعه قولي لا طقيتك

وقفت من الارض .. وقالت : ايه كلمت اخوي يوسف .. والحين بيجي ياخذني ..وش عندك

ضحكت على النكته اللي قالتها .. وقلت : لا دام انه اخوك يوسف الحرامي .. عادي

قالت : اخوي مو حرامي

ومدت يدها كانت بتصفعني .. بس انا مسكتها وقلت : ياويلك رهف لو تمدين يدك مره ثانيه

تركت يدها ..وكنت بطلع من الغرفه .. جات لعندي وقالت : زين بجلس هنا .. بس خلني اروح المدرسه

ابتسمت .. وقلت لها : لا تحلمين اخليك تروحين .. عشان تقابلين عبد الرحمن وغيره

قالت : قسم بالله ما اعرف واحد اسمه عبد الرحمن .. انت ظالمني .. قسم بالله ظالمني

قلت : بلا كلام فاضي .. ومدرسه مافيه

قالت : مشعل تكفى .. خلني اروح المدرسه .. حرام تقضي على مستقبلي

صرخت عليها .. وقلت : مافيه .. يللا قوليلي من بيوديك .. اذا انا مابوديك .. والسواق وصيته مايوديك

رجعت تبكي .. مالي خلق اسمع حنتها .. قلت لها : بخلي الباب مفتوح .. تقدرين تطلعين ..اذا حبيتي تتمشين في البيت .. بس طلعه برا البيت مافيه .. فاهمه

طلعت .. وقفلت الباب وراي

.
.
.

نزلت تحت .. شفت نجود وامي ..ونايف .. رحت سلمت وجلست

قالت امي : وش فيها رهف

قلت : مافيها شي .. شوية تعب

قالت امي : اجل خلها تغيب بكرا .. وخذها المستشفى

سكت شوي .. بعدين قلت : يمه رهف خلاص مابتكمل دراسه

لفت علي نجود وقالت : مشعل .. لاتمزح

قلت : والله زوجتي وانا حر .. ماابيها تكمل دراسه .. لانها كذا ولا كذا مصيرها بتخلص ثانوي .. وبخليها تجلس في البيت

قالت نجود بعصبيه : مشعل حرام عليك .. البنت شاطره وعندها طموح .. خليها تكمل

قلت : نجود .. لا تتدخلين في شي بيني وبين رهف

قالت امي بصوت هامس لنجود .. بس انا سمعتها : اسكتي .. مالك شغل فيه .. هو وزوجته احرار

الوحيد اللي ماعلق نايف .. قام من الكنبه .. وقال : تصبحون على خير

الكل قال : وانت من اهله


..............................

____________
بيت مشعل .. الساعه 6:30 صباحاً
____________


** نايف **


صحيت الصبح .. تروشت .. وبدلت ملابسي .. صليت .. ونزلت تحت .. دخلت المطبخ شفت نجود جالسه تفطر ..قلت : صباح الخير

قالت : صباح النور .. تعال نايف اجلس افطر معي

جلست معاها .. ماكان لي نفس الاكل .. فشربت حليب بس

قلت لها : وش فيك جالسه لحالك .. وين الناس

قالت : خالتي ام مشعل ورغد نايمين .. ومشعل راح الدوام

قلت لها : وبعد

ناظرتني .. وقالت : وبعد مين .... امممم رهف برا في الحديقه

سكت وشربت شوي من الحليب .. وقمت من مكاني .. طلعت من المطبخ .. ورحت الحديقه .. كنت بروح الدوام .. شفت رهف جالسه على كرسي بالحديقه ..قريب مني بس معطيتني ظهرها .. كانت تمسح دموعها ..شكلها اثر فيني اكيد تبي تروح المدرسه .. ولا وش مصحيها من الصبح .. دخلت داخل .. ورحت المطبخ .. جلست على الكرسي .. وقلت : نجود .. متى بتروحين الدوام

ناظرت للساعه اللي معلقه على جدار المطبخ .. وقالت : الساعه 8

قلت : قومي الحين

قالت : وليه اروح بدري

جلست افكر شوي .. وقلت لها : جودي ماتحسين رهف تكسر الخاطر

قالت : ومن وين طلعت لك هالمشاعر والاحاسيس المرهفه

قلت : لا جودي اكلمك جد

قالت : ايه والله نيوف .. هي تبي تروح المدرسه

قربت مني وقالت بصوت خفيف : لو شفتها يوم صحت الصبح .. قسم بالله كانت تبكي

قلت لها : قومي نجود ناخذها معانا

وهي تشرب الحليب ..هزت راسها يعني لا .. بعدت الحليب .. وقالت : ما اخاطر .. اخاف مشعل يذبحنا حنا الثلاثه

ضربت راسها وقلت : يا الخبله .. انا المدير .. ماراح اعطيه اذن انه يطلع من دوامه .. الا اذا رجعت رهف من المدرسه

مسكت يدي .. وقالت : بل عليك نيوف .. عليك افكار مو طبيعيه .. صحيح ولد عبد العزيز الله يرحمه

قلت : الله يرحمه .. يللا قومي البسي عشان تجين معانا .. وروحي قولي لها تلبس

قالت لي : بس تعال نيوف .. من بيرجعها من المدرسه

قلت : حنا بعد مين .. امر عليك اول واخذك .. بعدين نمر عليها وناخذها

قالت : مايحتاج تمر علي .. خذها على طول

قلت : ونصير انا وهي لحالنا

قالت : عادي اخو زوجها .. مافيها شي

قلت : لا مايصير .. يللا قومي

قالت : انا بروح ببدل .. وانت روح قول لها

قلت : لا انتي روحي

قالت : نايف ترا مافيه وقت

هزيت راسي ومشيت

وقفت وقالت : 1..2..3.. انـــــــطــــــــلاق



.
.
.

طلعت الحديقه .. ورحت لعندها

قلت : احم .. السلام عليكم

قالت بدون ماتناظر فيني .. وهي تلعب باصابعها : وعليكم السلام

قلت لها : رهف .. تبين نوديك المدرسه

لفت علي .. وقالت : انت توديني

ابتسمت وقلت : لا انا واختي جودي

قالت : لامشكور

قلت بصوت عالي : لــــــــيـــــــــــه

خفضت صوتي .. وقلت : قصدي ليه يعني

قالت : مشعل مايبـ ..

قاطعتها وقلت : بس انتي تبين .. ولا تخافين .. ماراح يعرف مشعل

كانت ساكته تفكر

قلت : يللا بسرعه مافيه وقت

وقفت .. وقالت : دقايق ببدل ملابسي .. وبجي .. انتظروني .. ماراح اتأخر


........................................

** رهف **


دخلت داخل بسرعه .. وكاني ماصدقت على الله .. واناراكبه الدرج .. نجود كانت نازله .. مسكت ايديني الثنتين .. وقالت : بسرعه بسرعه رهف روحي بدلي .. لا تتاخرين.. حنا تحت ننتظرك

قلت : اوكي ماراح اتاخر

تركتها .. ورحت الغرفه .. بدلت على السريع .. واخذت شنطتي والعبايه .. نزلت تحت .. شفت نايف ونجود .. واقفين عند باب الصاله .. يوم شافوني .. راحوا ركبوا السياره .. رحت وركبت ورا .. وحرك نايف

مو مصدقه اني رايحه المدرسه .. ان شاء الله مايعرف مشعل .. لاني بورط نفسي .. وبورط نايف ونوجود معي .. جلست اراقب كلام نايف ونجود طول الطريق
.
.

نجود : نيوف شوف الاشاره تشبه لك صح

نايف : ايه هو في الملامح تشبه لي .. بس الجسم مايشبه لي .. انا مو ضعيف .. بس انتي لو تشوفين الكوره تشبه لك في كل شي

نجود : وش قصدك انا دبه .. ان عضيتك لا تقول ماسويت شي

نايف : نجود لا تقربين لي .. ترا ان دعمتنا سياره .. بنروح فيها حنا الثلاثه .. ترا مالي خلق ادفع مصاريف مستشفيات

نجود : اما انا لو دعمتنا سياره .. ابي اموت على طول .. ما ابي ارجع البيت .. ويذبحني مشعل

نايف : اتحداه يلمس شعره منك .. تدرين انا لو دعمتنا سياره وش بسوي؟

نجود : صدق انا وانت دلوخ .. وش هالفال .. نتبلى على اعمارنا

نايف : ايه والله

نجود : بس انا نيوف ابي اموت قبلك

نايف : لا انتي عمرك طويل ان شاء الله .. انا ابي اموت قبلك

نجود : لا ما اقدر اعيش بدون اخوي .. ان شاء الله نموت جميع

نايف : الاعمار بيد الله

نجود : والنعم بالله ..... امممم نايف

نايف : هلا

نجود : وش هدفك في الحياة ؟

نايف : للأسف هدفي في الحياة طلع تسلل

نجود : هههههههههههههه من جدك

نايف : جدي الله يرحمه

نجود : هههههههههههههههههه نايف تنكت ؟

نايف : لا احاول

نجود : اجل ابشرك محاولاتك كلها فاشله هههههههههههههه

نايف : فاشله وانتي ميته ضحك .. ارحمي نفسك
.
.

اتمنى لو نجود اختي .. ونايف اخوي ..لو مشعل خذ شوي من نايف .. او شوي من نجود .. ماطلع عليهم ولا كانه اخوهم ؟.. نايف ونجود يحبون بعض .. ويحبون كل اللي حواليهم .. واحسهم يحبون مشعل بعد .. بس مشعل ثقيل دم وماينطاق مايحب احد .. مثل بنته رغد

^*^
/
\
/
\
/
\
/
\
/
^*^

**** نهاية الجزء الخامس عشر ****

_____________
بيت العمه .. الساعه:30 صباحاً
_____________


** حنان **


كنت جالسه بالصاله افكر بموضوع رهف .. وش صار عليها هالشينه .. اموت واعرف ..الحين اكيد مشعل طلقها .. وطاحت من عيون نايف ونجود .. وطبعاً دام انه طلقها بترجع بيت اهلها .. يعني هي تطلع وانا ادخل .. وبيحلى لي الجو انا ونايف .. ما اطلع انا حنان ان ماتزوجته .. سمعت صوت امي .. وهي تقول : وين سرحانه ..جالسه اكلمك ماتردين علي

قلت لها : من متى انتي هنا .. ماشفتك

جلست على الكنبه .. وقالت : في مين تفكرين

قلت لها وانا ابتسم : وبفكر في مين يعني غير نيوف

قالت : وش فيك مبسوطه كذا

حطيت رجل على رجل .. وقلت لها وانا العب بخصله من شعري : لان خلاص .. قربت اتزوج نايف

حضنتني وقالت : مبروك يابنتي

قلت لها : الله يبارك فيك

بعدت عني وقالت : وش اول شي بتسوينه .. اذا تزوجتي نايف

قلت لها على طول : طبعاً بخليه يكتب البيت بأسمي

قالت : وبعد

قلت : وشلة مشعل وامه ونجود ورغد .. هذيلا بخليه يشوف لهم صرفه .. ماابي اجلس معهم في بيت واحد .. ابي البيت لي لحالي .. وانتي معي طبعاً

قالت امي : عادي اكيد مشعل بيتزوج وبياخذ بنته وامه معه .. ونجود في هذاك الوقت بتكون متزوجه

حطيت يدي على صدري بقوه .. وقلت : فال الله ولا فالك ..تخيلي نجودوه تتزوج قبلي وانا اكبر منها .... وبعدين اي وقت اللي تتكلمين عنه .. نايف بيتزوجني قريب

قالت : ان شاء الله

جا ابوي وقال لامي تقوم تجهز الفطور ..قامت امي .. ورجعت انا افكر ..ناظرت للتلفون شوي ..ايه صح .. بدق على بيت خالي .. وبشوف اذا رهف في البيت اولا

دقيت .. وردت الخدامه .. قلت لها : وين نجود

قالت : مو موجود

ايه صح .. نجود في الدوام .. قلت لها : مدام رهف موجوده ؟

قالت : لا مو موجود

قفلت السماعه في وجهها ..وركبت غرفتي ..دخلت وجلست على كرسي الكمبيوتر ..ايه الحين الواحد يقدر يخش نت مرتاح .. دام ان رهف مو في البيت .. يعني اكيد مشعل طلقها ورجعها بيت اهلها


...............................


_____________
السياره..الساعه:1:30 مساءً
_____________

** نجود **

كنت مع نايف في السياره .. رايحين لرهف المدرسه ..ومن النعس كل شوي اغمض عيوني وانام .. سمعت صوت نايف يقول لي : جودي .. جودي .. وينك نمتي

فتحت عيوني .. وعدلت جلستي .. قلت : هلا .. لا

قال : جودي تهقين تأخرنا على رهف

قلت : لا .. وقتنا حلو

قال بتفكير : بس وشلون بيشوفونها البنات تركب معي .. بيقولون من هذا ؟؟

قلت بأبتسامه : لا مابيقولون ..بيشوفوني معكم .. بيدرون ان حنا اهلها

هز راسه .. وسكت .. احس نايف يعتبر رهف مثل اخته .. ويخاف عليها مثل مايخاف علي .. وهالشي حبيته .. لاني ما ابي رهف تحس نفسها غريبه بيننا

وقف السياره بجنب المدرسه .. وقال : يللا انزلي نادي عليها

سندت ظهري .. وقلت : هي تعرف السياره .. بتشوفها وبتجي اكيد

قال : ونخليها تدور السياره في هالشمس

تكتفت وقلت : اجل انا انزل ادورها بين البنات .. في هالشمس

عطاني نظره جاده وقال : نـجـود

فتحت الباب وقلت : زين زين .. وش نسوي بعد ..حكم القوي على الضعيف

قال : اي ضعيف الا دبه ..ياتسوين رجيم ياماتركبين سيارتي

لفيت عليه وكنت بتكلم .. بس قال على طول : انزلي بس لاتتاخرين عليها

نزلت من السياره .. ودخلت المدرسه .. كانت زحمه مره .. وقفت وجلست اناظر هنا وهناك ..الحين وين اشوف رهف بهالزحمه ..دفتني وحده بقوه ..وقالت لي بصوت عالي : عميه انتي .. ماتعرفين تمشين

راحت على طول .. مامداني اقول لها شي ..غبيه تقول لي ما اعرف امشي وانا اصلاً كنت واقفه .. اعوذ بالله من بنات هالعالم .. مشيت شوي ..وانا ادور على رهف بعيون .. ايه شفتها .. بروح لها .. الزحمه مو مخليتني اروح .. وانا بموت من الحر .. قلت بصوت عالي : رهـــــــــف

لفت وناظرتني : قالت نجود

قربت شوي .. ومدت يدها سحبتني .. قلت لها : ياربي وش هالزحمه

ضحكت وقالت :لان كل البنات طالعين على بيوتهم .. اكيد بيصير زحمه

لفت رهف للريم .. وقالت : ريوم هذي نجود .. اخت زوجي مشعل

سلمت علي .. وقالت وهي مبتسمه :انتي جيتي ملكتي صح

قلت لها : ايه وكنتي مره حلوه

قالت : رهف قالت لي انك جيتي .. قلت لها وشلون جات وانا ماشفتها

قلت لها : غريبه مع اني سلمت عليك وباركت لك

قالت : ماركزت في الناس

ضحكت وقلت لها : ما الومك

لبست رهف العبايه .. وجات بتحمل الشنطه .. اخذتها من عندها وقلت : هاتي احملها عنك .. حاملتها طول اليوم اكيد انكسر ظهرك

اخذتها من عندي وقالت : لا عادي اصلاً ماحملتها اليوم كثير .. تسلمين حبيبتي

قلت بمرح : والله انتي الخسرانه

ضحكت رهف وضحكنا انا والريم معاها .. جات لهم البنت اللي دفتني .. وقالت وهي مستعجله : رهوف ريوم .. اشوفكم بكرا .. وانتي رهوف لا تتاخرين مثل اليوم

على طول قلت لرهف : تعرفينها

قالت : هذي هند صديقتي

قلت بسرعه : هذي دفتني وقالت عني عميه

ابتسمت رهف وقالت : انا اوريك فيها

هذيك كانت ماشيه .. سحبتها رهف من شنطتها ..وقالت : هيه انتي ..ماتستحين تقولين عن نجود عميه

عدلت شنطتها وقالت : وشو اي نجود

ضربتها رهف ضربه خفيفه .. قالت : نجود هذي حبيبتي ما ارضى عليها

حسيت البنت تفشلت .. قالت : مادري انا ما انتبهت

قالت الريم : الا انتبهتي ومبين من عيونك

قالت البنت : يللا عاد هالثنتين يبون الزله مني عشان يهاوشوني ..قلنا لكم ماندري وموقصدنا

ضحكت انا .. وقلت : لاعادي .. ماصار شي .. بس مره ثانيه مو تدفين بنت واقفه .. ومن فشلته تقولين عنها ماتعرف تمشي

ضحكنا كلنا مع بعض .. بعدين قالت رهف : يللا نجود خلينا نروح .. الحين اكيد اخوك احترق في هالشمس .. اشوفكم بكرا بنات





.
.
.


طلعنا انا ورهف من المدرسه .. وركبنا السياره .. اول ماركبنا قلت لنايف : تأخرنا

حرك السياره .. وقال : لا اصلاً بسرعه طلعتوا

بعد مامشينا ..جلست اناظر بالدريشه ..مرينا على باسكن روبنز .. لفيت على نايف وقلت له برجاء : نيوف عاد خذ لنا من باسكن .. اشتهيت

قال : من عيوني

قلت : تسلم عيونك الغاليه

وقف السياره بجنب باسكن .. وقال : وش تبون

قلت : اناابي توفي

قال : طيب ورهف وش تبي

قالت بصوت ماينسمع .. قصدي ينسمع بس مو مره : ماابي شي .. مشكور

دفني نايف بيده .. واشر لي بعيونه على ورا .. قلت : يللا عاد رهوف .. ماابي اكل لحالي

قالت : والله ما ابي

قلت : ترا بزعل عليك ان ما اكلتي معي ايس كريم

قال نايف : لا تستحين ترا مو انا اللي بدفع .. نجود هي اللي بتدفع

قلت بسرعه .. وبصوت عالي : نعم نعم ..ليه عازمنا اذا كنا حنا اللي بندفع

قال بدهشه : انا عزمت احد ؟ .. ماجبتكم هنا ..الا يوم قلتي انتي تبين

قلت : عادي قول ماراح اجيبكم .. مو تجيبنا وتخلينا ندفع

قال : اجل خلاص بدال هالهوشه كلها .. نخلي رهف تدفع

قالت رهف بنفس الصوت اللي قبل شوي : ولا يهمكم

ضحك نايف وقال : اما عاد انتوا تدفعون وانا موجود

ضحكت انا وقلت : ايه على بالي بعد

نزل من السياره .. وقفل الباب

قالت لي رهف : جودي كيف دوامك

قلت : حلو .. وانتي كيف الدراسه

قالت : قربت الامتحانات

قلت لها : الله يوفقك

قالت : الجميع يارب

قلت لها وانا اضحك : صديقتكم هذيك مرجوجه

قالت : من ؟ هنوده

قلت : ايه

قالت : مره مرجوجه .. بس ان شاء الله اذا تزوجت تركد

لفيت عليها وقلت : لا تقولين انها مخطوبه ؟

قالت : ايه مو من زمان .. يللا عقبالك

مدري ليه يوم قالت عقبالك جا على بالي فيصل .. نزلت راسي مستحيه من اللي في بالي

رفعته بشويش وناظرت في الدريشه .. لمحت نايف جاي جهتنا .. وكان عاقد حواجبه واضح انه متضايق من الشمس


فتح باب السياره .. ودخل .. قال : قسم بالله هالجو ماعرفنا له .. يوم برد ويوم حر

شفتوا قلت لكم ....!!

قلت له : ايه متعود على جو امريكا

ناظرني وقال : لاجو امريكا خلاص باي باي .. نسيته

عطاني اثنين ايس كريم .. اشر لي على ورا .. يعني عطيه رهف .. عطيته رهف واحد وخليت عندي واحد

فتحت وجهي .. عشان ابي اكل.. قال نايف بهدوء : مو قلت لك الف مره .. لا تفتحين وجهك بالشارع

قلت بقهر : بس حنا مو بالشارع .. حنا بالسياره ومافيه احد .. والبيت قريب

قال : هذا انتي قلتيها البيت قريب .. لا وصلنا كليه .. يللا غطي وجهك

غطيت وجهي .. وانا اناظر في الايس كريم .. اوف بيذوب

.............................

____________
بيت ابو يوسف ..الساعه :3:30 مساءً
____________


** محمد **

كنت منسدح على السرير والعب بالهديه اللي شاريها للريم
ابي اوديها لها الحين

بدق عليها بشوفها صاحيه او نايمه

دقيت عليها وجوالها كان مقفل .. مت قهر .. عندي انها ماترد علي ولا انها تقفل جوالها .. ماتدري اني اخاف عليها .. صبرت ربع ساعه بعدين دقيت عليها

ردت علي بصوتها الناعم : هلا محمد

قلت بسرعه : ليه مقفله جوالك ؟

قالت : اخبارك

قلت وانا ماسك اعصابي : الريم .. انا سألتك جاوبيني

اخذت نفس وقالت : ساره لعبت في جوالي وقفلته

تنهدت براحه

وقلت بهدوء : زين حبيبي مره ثانيه تأكدي من جوالك اذا مقفل اولا .. توقعي اتصالي في أي دقيقه

قالت بهمس : ان شاء الله

قلت : فديتها عمري اللي تسمع الكلام

كانت ساكته ناديت عليها

قالت : لبيه

قلت : لبى قلبك .. مشتاق لك

قالت وواضح من صوتها انها استحت : وانا بعد

قلت بأستهبال : انتي وشو

قالت : اشتقت لك

ياربي شكثر احب هالبنت .. قلت : طيب ليه ماقلتي لي .. ليه ماتقولين انك مشتاقه لي .. لازم اطر عندك

قالت : لا فديتك

قلت : حبيبي ابي اشوفك .. بجيك الحين اوكي

قالت : حياك .. انتظرك

ابتسمت لها كانها تشوفني وقلت : 5 دقايق وانا عندك .. باي حبي

قالت : بايات

ناديت على سعد بصوت عالي .. لازم اقنعه انه يجي معي .. لاني مستحيل اجلس مع ساروه مره ثانيه .. خلاص توبه

جاني وفي يده كاتب .. وقال : نعم

قلت : حبيبي سعودي

نزلت لعنده وبسته

ناظرتي مستغرب وقال : وش تبي

قلت : تعال معي بيت ابو فارس

قال بصدمه مخلوطه بدهشه مع اشوية قرف : بيت ســــــــــــــــــــاروووووووه

قلت : وش فيها يعني

عطاني ظهره وقال : لالا ماابي اروح معك

مسكت يده وقلت : يللا عاد سعوودي

رفع حاجب وقال : ماتشوفني اذاكر

سحبت الكتاب من عنده ورميته على السرير

وقلت : لا تحطها على المذاكره

قال : امي مابترضى

قلت : انا بقنعها ’’ برجاء ’’ بس انت الله يخليك تعال معي

قال وهي يتأفأف : ما ابي .. ساروه الدبه ماتخليني اسوق السيكل

قلت : هي تحب تلعب معك

قال وهو يحرك صبعه : نو .. نو .. نو

قلت بأصرار : بتجي معي يعني بتجي

قال : وش تعطيني اذا رحت معك

قلت : بعطيك كف .. امش معي يللا

انسدح على الارض .. وقال : ماراح اجي

قومته من الارض .. وقلت : بشتريلك اللعبه اللي تبيها .. بس تعال معي

ضحك بصوت عالي وقال : ايه كذا الشغل ولا بلاش

طلعنا انا وسعد من البيت .. ومشينا لبيت الريم .. دقيت الباب .. فتحت ساره .. وقالت : واخيراً جا محمد حبيبي .. من زمان انتظرك

مسكت وجه سعد .. وقربته لها : سعد جا يلعب معك

صفقت بيدينها وقالت : الله وسعد بعد

سمعت صوت الريم .. تقول : ساره مين اللي عند الباب

قالت ساره بصوت عالي : محمد واخوه سعد

لمحت طيف الريم وهي جايه عندنا .. بمشيتها الهاديه .. وابتسامتها الرقيقه

على طول دق قلبي من شفتها .. وحشتني مره .. مع انها كانت معي امس .. بس هي غير عن كل الناس .. الريم توحشني كل دقيقه وكل ثانيه وحتى وهي معي توحشني

سلمت علي .. رديت عليها السلام

مسكت خد سعد وسحبته بشويش ابتسمت له وقالت : هلا سعودي .. كيفك

ابتسم لها وقال : زين

ناظرتني وقالت : ادخل محمد

مشت ومشيت وراها .. ورحنا المجلس ..جلست وانا مرتاح .. لان ساره النشبه مو معنا ..جلست هي بجنبي

قلت لها : اخبارك قلبي ..واخبار المدرسه

قالت بملل : ماشي الحال

قلت : وش فيك تقولينها كذا

قالت : خايفه من الامتحانات ’’ وملامحها كانت من جد تدل على انها خايفه ’’

سحبت يدها وضميتها بيديني الثنتين

قلت : وليه عاد الخوف.. انتي شاطره

ناظرت في يدها اللي بيدي يديني وقالت : بس هذا ثالث

قلت : طيب حياتي وش رايك اذاكر لك

ضحكت .. وقالت : اصلاً حنا مراح نشوف بعض في الامتحانات

فتحت عيوني وقلت : وليه مانشوف بعض

قالت : لان لا جلسنا مع بعض ..بنضيع الوقت .. وماراح اذاكر زين

قلت بأعتراض : بس انا ما اصبر عنك

سحبت يدها اللي كنت ماسكها .. قرصت خدي بشويش وقالت : في الامتحانات غصب عنك تصبر

قلت وانا لاوي فمي : وفي كل امتحانات ماراح نشوف بعض

هزت راسها بأيه .. قلت : ريمي ..اجل وش رايك نتزوج الحين في هالفتره

قالت : لا مستحيل نتزوج قبل ما اخلص ثالث

قالت هالكلام .. ووقفت .. قلت لها : وين بتروحين

قالت : ماتقهويت

مسكت يدها .. وخليتها تجلس .. عطيتها الكيس اللي فيه الهديه .. اخذته .. وقالت : وش هذا

ابتسمت .. وقلت لها : افتحيه

فتحت الكيس .. واخذت العلبه اللي فيها الساعه ..فتحتها وقالت : الله تجنن ..تسلم حبيبي .. الله يخليك لي

قلت لها : ويخليك لي حبيبي ولا يحرمني منك

مسكت الساعه .. ولبستها الريم .. رفعت يدها بستها وقلت : صارت احلى عليك

نزلت راسها بحيا .. وبعدت عني شوي

تركت يدها .. ومسكت الكيس الي كانت فيه الساعه فتحت.. وطلعت منه ورده رفعت حاجب وقلت : وش فيك بعدتي .. قربي

قربت بخجل .. مسكت شعرها .. وحطيت فيه الورده ..وقلت لها : شكلك كذا ذكرني بيوم الملكه .. لانك كنتي مره حلوه

قالت بدلع : كنت حلوه بيوم الملكه بس ..؟

قلت : لا فديتك في كل يوم تصيرين احلى واحلى ..بس تصدقين .. احلى مره شفتك فيها .. يوم كنتي في بيتنا

عقدت حواجبها .. وقالت : متى ؟

قلت : يوم تلعبين انتي ورهف بالمويه

لفت وجهها عني .. وقالت : محمد عاد لا تحرجني

ضحكت .. وقلت : امزح معك .. يللا انا الحين بروح

وقفت .. ووقفت هي بعد .. قالت : وين بتروح بدري .. توك جاي

قلت لها : ميخالف ياقلبي بكرا بجيكم

قالت : ماراح تجي الليله

قلت : لا الليله بطلع مع اخوياي

حركت شفايفها بقهر وقالت : طيب

حطيت ايدي .. على شعرها رجعته ورا اذنها وقلت : يعني تبيني اجي الليله

هزت راسها بأيه

قلت : بس انا ما اقدر اجي هههههههه

ضربت كتفي بشويش وقالت : خلاص بشوفك بكرا

وصلتني للباب .. ناظرت في سعد وهو يلعب بالسيكل مع ساره .. وقلت له : سعد .. يللا بنروح

جا يركض .. مسكت يده .. وقلت : يللا الريم خلي بالك من نفسك فديتك

قالت : ان شاء الله .. وانت بعد


......................


___________
بيت مشعل .. الساعه :4:00 مساءً
___________


** مشعل **

رجعت من الدوام .. معصب ..وين ايام اول .. ارجع وقت اللي يعجبني .. اكيد الحين الكل تغدا .. ركبت فوق على طول .. دخلت الغرفه .. شفت رهف فاتحه الدولاب .. وجالسه تطوي الملابس .. قفلت الباب . وقلت : ايه كذا شكلك حلو .. جالسه في بيت زوجك تطوين الملابس تشوفين لك شغله .. مو تروحين من الصبح هالمدارس

رمت القميص اللي بيدها .. وقالت : مشعل خلاص لا تكلمني .. انا بنسى وجودك .. وانت انسى وجودي

اخذت القميص اللي رمته .. وقلت : نونو .. كذا موصح ..خليني اعلمك الطريقه الصحيحه في طي الملابس

قفلت الدولاب .. وراحت جلست على السرير .. وتكتفت وهي تهز رجلها ..رحت جلست بجنبها .. وتكتفت وهزيت رجلي

لفت علي .. ناظرتني بستحقار وقالت : انت كم عمرك ؟

حطيت يدي على ذقني وقلت : 18 سنه

قالت : والله لو انا مكانك استحيت

انسدحت على السرير وقلت : طيب انا ما استحي

قامت من السرير .. وراحت عند الباب .. رفعت راسي ..قلت : وين بتروحين

قالت بملل : بطلع

قلت : من سمح لك تطلعين .. الحين انا اتكلم .. تقاطعيني وتطلعين .. هذا احترام الزوجه لزوجها

رجعت .. وجلست على الكرسي .. حطت يدها على خدها .. وقالت : جلسنا .. وش تبي تقول .. امر

تغطيت وغمضت عيوني قلت : طفي النور ابي انام

سمعت صوت باب الغرفه يتقفل بقوه

رفعت راسي وناظرت في الباب .. مجنونه هذي .. تبي تكسر لنا باب الغرفه !!.. حطيت راسي على المخده مره ثانيه ونمت

............................................